Qarshi tumanining sobiq hokimi Maqsuda Mustafoyeva maktab direktori sifatida ish boshladi

Qarshi tumanining sobiq ayol hokimi Maqsuda Mustafoyeva Qarshi shahridagi maktablarning birida direktor sifatida ish boshladi. Bu haqdagi xabarni viloyat xalq ta’limi boshqarmasi axborot xizmati tasdiqladi.

Ma’lum qilinishicha, sobiq hokim Qarshi shahridagi 11-sonli maktabda rahbar sifatida ish boshlagan.

Qarshi tumanini salkam ikki yil boshqargan Maqsuda Mustafoyeva hokimlikka kirishganidan bir oy ham o‘tmasdan, prezident ishonch bildirgan klasterni tugatish tashabbusi bilan chiqib, ko‘pchilik e’tiboriga tushgan bo‘lsa, tadbirkorni tuman uchun bog‘cha yoki maktab qurib bermaslikda ayblashi ortidan ko‘plab muhokamalar sababchisi bo‘lishga ham ulgurgandi. Keyinchalik tadbirkor bilan sudlashishni boshlagan hokim tadbirkorni telefon qo‘ng‘iroqlariga javob bermaslikda aybladi.

Yuz million so‘mlik saxovat pullarining yeb ketilishi ortidan yana internetda ko‘rinish bergan Maqsuda Mustafoyeva viloyatning sobiq hokimi Zoir Mirzayevning afsusiga ham sabab bo‘lgandi. Jurnalist va blogerlar bilan suhbatlashgan Zoir Mirzayev Maqsuda Mustafoyeva haqida gapirib, “Barchada xato va kamchiliklar bo‘ladi, albatta. Rahbar sifatida buni tanqid qilaman. Yaqinda Qarshi tumani hokimi bilan suhbatlashib, kamchiliklarini ko‘rsatdim. Men boshida uning ishini ko‘rmasdan, hokimlikka tavsiya berganimni xatoyim deb bilaman”, — degandi.

“Daryo” manbasi 2022-yilning 2-fevral kuni davlat rahbari Shavkat Mirziyoyev raisligida videoselektor yig‘ilishi o‘tkazilganini, unda prezident ko‘plab tuman hokimlarining ish faoliyatidan qoniqmayotganini aytib, Qashqadaryo viloyatining yagona ayol hokimini ishdan olganini va bu boshqalarga “dars” bo‘lishi kerakligini ta’kidlaganini bildirgandi. Shundan beri Maqsuda Mustafoyeva ishsiz edi.