Namangan viloyati hokimi Shavkat Abdurazzaqov boshchiligidagi delegatsiya Rossiyaning Samara viloyatiga safarini boshladi. Bu haqda “Daryo” muxbiri Azizbek Abduvaliyev xabar bermoqda.
Abdurazzaqovning Samara viloyati gubernatori Dmitriy Azarov bilan muzokaralari bo‘lib o‘tdi. Unda ikki hudud o‘rtasida savdo-iqtisodiy, ilmiy-texnikaviy, ijtimoiy-madaniy va gumanitar sohalarda hamkorlik to‘g‘risida bitim imzolandi.
Uchrashuvda Namangan va Samara viloyatlari o‘rtasidagi hamkorlikni yanada rivojlantirish bo‘yicha qator takliflar bildirildi. Shavkat Abdurazzaqov Samara viloyatining transport, metallurgiya, plastmassa buyumlari va oziq-ovqat mahsulotlari korxonalari bilan qo‘shma loyihalarni amalga oshirish bo‘yicha aniq rejalarni ilgari surdi. O‘z navbatida, Dmitriy Azarov Namanganga Samara viloyati sanoat va agrosanoat majmualari mahsulotlarini eksport qilishni rivojlantirish istiqbollari, Samarada Namangan viloyati savdo-distribyutorlik markazini ochish, Volga bo‘yi hududida to‘qimachilik sanoati bo‘yicha qo‘shma korxonalar tashkil etish bo‘yicha takliflarni bildirdi.
Ma’lumot uchun, Namangan viloyati delegatsiyasi tarkibida 70 nafardan ortiq turli soha vakillari bor. Biznes, ijtimoiy soha va madaniyat vakillari Samarada o‘zaro hamkorlikni rivojlantirish bo‘yicha muzokaralarda ishtirok etmoqda.
Mavzuga doir: Rossiyaning Samara viloyati gubernatori o‘rinbosari boshchiligidagi delegatsiya Namanganga keldi (foto va video)
Izoh (0)