«Юрагининг ўнг бўлмачасида дефект аниқланган». Мудофаа вазирлиги қаршилик аскарнинг ўлими сабабини маълум қилди

Қашқадарё вилоятининг Қарши шаҳрида яшовчи аскар йигит Термиз шаҳридаги хизмати давомида вафот этгани ва уйига ўлик ҳолда қайтгани ҳақида хабар берилганди. Мудофаа вазирлиги аскар йигит ўлимига юрагидаги нуқсони сабаб бўлганини билдирди.

Термиздаги ҳарбий қисмларнинг бирида хизмат қилаётган оддий аскар К.Қ. соғлиғи бўйича шикоят қилганлиги сабабли 11 ноябрь куни Марказий ҳарбий клиник госпиталга ётқизилган. Тиббий текширувлар натижасида бемор К.Қ.да юракнинг ўнг бўлмачасида контраст тўлдириш дефекти (тромб), кўкс оралиғида ҳажмли ҳосила, икки томонлама гидроторакс аниқланган. 14 ноябрь куни бемор шошилинч равишда American Hospital клиникасида кардиохирург консультациясига олиб борилган.

Бемор ҳаёти учун ташхис ва жарроҳлик операцияси ўта хавфли ҳисобланади. Аммо ҳаётий кўрсатмаларга асосан жарроҳлик операциясини бажариш лозимлиги сабабли клиникада госпитал мутахассислари иштирокида жарроҳлик операцияси ўтказилган. Беморнинг умумий аҳволи ўтказилган жарроҳлик операциясига мос равишда оғирлигича қолган. Ўтказилган реанимацион чора-тадбирларга қарамасдан беморда биологик ўлим қайд этилган, — дейилади Мудофаа вазирлиги Ахборот ва оммавий коммуникациялар департаменти берган маълумотда.Аскар йигитнинг ўлими ҳақида жамоатчиликка хабар берган блогер Азизбек Яздурдиев марҳум йигит ҳарбий оркестрда хизмат қилган бўлиши мумкинлигини айтганди.

Икки кун илгари уйдагиларига қўнғироқ қилиб, пул кераклигини, узоқроқ жойга кетишаётганини айтган экан. Раҳматли қўли гул сартарош, мусиқа асбобларини чала оладиган даражада санъаткор йигит эди, — деганди Азизбек.

Марҳум 15 ноябрь куни ўзи яшовчи «Гулшан» маҳалласидаги хонадонига олиб келинган.

Мавзуга доир: Қашқадарёда ҳарбий хизматга борган 18 ёшли йигит уйига ўлик ҳолда қайтди