O‘zbekistonda 2021-yilda 800 nafarga yaqin yetim va ota-ona qaramog‘idan mahrum bo‘lgan bolalar uy-joy va yashash uchun jihozlar bilan ta’minlangan. Bu haqda Senat raisi Tanzila Norboyeva O‘zbekistonning Bola huquqlari to‘g‘risidagi konvensiyaga qo‘shilganining 30 yilligiga oid davra suhbatida ma’lum qildi, deya xabar bermoqda “Daryo” muxbiri.
Yig‘ilishda Tanzila Norboyeva yetim va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlash borasida bajarilayotgan ishlar haqida gapirdi.
Bugungi kunda 20 ta mehribonlik muassasasi, xususan, 13 ta mehribonlik uyi, 4 ta bolalar shaharchasi va 3 ta bolalar uyi faoliyati tugatildi. Ularda tarbiyalanayotgan jami 2 ming 161 nafar tarbiyalanuvchi o‘z oilasi va yaqin qarindoshlariga, oilaviy bolalar uylariga, ta’lim muassasalariga o‘tkazildi. E’tiborli jihati, 134 ta oilaviy bolalar uylarida 839 nafar tarbiyalanuvchi mavjud bo‘lib, mazkur oilaviy uylarning 130 tasi o‘tgan bir yil davomida tashkil qilingan. Oilaviy bolalar uylaridagi 839 nafar bolaning 719 nafari mehribonlik uyidan, 18 nafari bolalar uyidan, 24 nafari IIB voyaga yetmaganlar ijtimoiy markazidan, 45 nafari hokimlik qarori bilan qabul qilingan.Avvalroq Senat raisi so‘ngi uch yil ichida Suriya, Iroq va Afg‘onistonda og‘ir ahvolga tushib, chorasiz qolgan 438 nafar ayol va bolalar O‘zbekistonga olib kelinganini ma’lum qilgandi.Bugungi kunda mamlakatimizda 3 ta mehribonlik muassasasida 270 nafar, 3 ta “SOS - O‘zbekiston bolalar mahallalari”da 173 nafar, 10 ta bolalar uylarida (“Dom malyutki”) 319 nafar bola tarbiyalanmoqda.
O‘tgan yildan boshlab mamlakatimizda yetim va ota-ona qaramog‘idan mahrum bo‘lgan bolalarni uy-joy bilan ta’minlash tizimi joriy etildi. Birgina 2021-yilda 800 nafarga yaqin yetim va ota-ona qaramog‘idan mahrum bo‘lgan bolalar uy-joy hamda yashash uchun to‘liq jihozlar bilan ta’minlandi. Bu jarayon joriy yilda ham davom ettirilmoqda. Shuningdek, yetim bolalar va ota-ona qaramog‘idan mahrum bo‘lgan bolalarning muammolarini o‘rganish hamda hal etish, ularning orzu-istaklarini ro‘yobga chiqarishga ko‘maklashish maqsadida “Mehr daftari” jamg‘armasi tashkil qilinib, 70 milliard so‘m mablag‘ shakllantirildi.
Tanzila Norboyeva, Senat raisi.
Izoh (0)