Qamchiq dovoni noqulay ob-havo sababli avtomobillar harakati uchun noma’lum muddatga yopilgani haqida xabarlar tarqalgan edi. Yo‘l harakati xavfsizligi xizmatining ma’lum qilishicha, dovonda transportlar harakati davom etmoqda.
Ta’kidlanishicha, hududda shamol tezligi kuchaygan. Transport vositalari harakati davom etmoqda. Maxsus texnikalar yordamida yo‘llar qordan to‘xtovsiz tozalanmoqda.
Dovon yo‘lida transport vositalarining harakati bilan bog‘liq xabarlarni rasmiy sahifalar orqali kuzatib boring. Mazkur yo‘lda harakatlanuvchi barcha haydovchilardan oraliq masofani saqlab, tezlikni me’yordan oshirmasdan, qoidalarga rioya qilgan holda harakatlanishlarini so‘raymiz, — deyiladi xabarda.
Favqulodda vaziyatlar vazirligi ham holat yuzasidan ma’lumot berib, dovon avtomobillar harakati uchun ochiq ekanini ma’lum qildi.
Ayni daqiqalarda Qamchiq dovonida Favqulodda vaziyatlar vazirligi yo‘lni qordan tozalash va muzlamalar hosil bo‘lishining oldini olish, qum-tuz aralashmasini sepish ishlarini muvofiqlashtirib bormoqda. Dovon yo‘li avtomobillar harakati uchun ochiq va ikki tomonlama harakat davom etmoqda.Shu o‘rinda, Favqulodda vaziyatlar vazirligi yo‘l transport hodisalari bilan bog‘liq favqulodda vaziyatlarning oldini olish maqsadida dovon hududida harakatlanishda haydovchilardan barcha xavfsizlik choralarini ko‘rishlarini so‘rab qoladi, — deyiladi bayonotda.
“O‘zgidromet” mutaxassisi Erkin Abdulahatov esa “Qorbo‘ron kuchli va, menimcha, vaqtincha yopilgani ham ma’qul”, — deb yozgan o‘zining Telegram kanalida.
Izoh (0)