Oxirgi uch yil ichida Suriya, Iroq va Afg‘onistonda og‘ir ahvolga tushib, chorasiz qolgan 438 nafar ayol va bolalar O‘zbekistonga olib kelingan. Bu haqda Senat raisi Tanzila Norboyeva O‘zbekiston Bola huquqlari to‘g‘risidagi konvensiyaga qo‘shilganining 30-yilligiga bag‘ishlangan davra suhbatida ma’lum qildi, deya xabar bermoqda “Daryo” muxbiri.
Bugun (16-noyabr) Senatda o‘tkazilgan va UNICEF, BMT, parlament hamda hukumat vakillari ishtirok etgan muloqotda Tanzila Noboyeva “Mehr” operatsiyasi doirasida bajarilgan ishlarga to‘xtaldi.
O‘zbekistonning onalar va bolalar huquqlarini himoyalashdagi qat’iy pozitsiyasini keyingi 3 yilda davlat rahbari boshchiligida amalga oshirilgan birgina “Mehr” operatsiyasi ham tasdiqlaydi. Bugungi kunga qadar o‘tkazilgan “Mehr-1, 2, 3, 4” operatsiyalari doirasida Suriya, Iroq va Afg‘onistonda og‘ir ahvolga tushib, chorasiz qolgan 438 nafar ayol va bolalar mamlakatimizga olib kelindi. O‘tgan 2021-yilda hamkor davlatlar ko‘magi bilan amalga oshirilgan “Mehr-5” operatsiyasi tufayli Suriyada uch yildan ortiq vaqt davomida ushlab turilgan 24 nafar ayol hamda 69 nafar bola O‘zbekistonga qaytarildi. Ularning jamiyatga integratsiyasi uchun barcha shart-sharoitlar yaratildi.Tanzila Norboyeva bolalar sog‘ligini saqlash bo‘yicha davlat tomonidan bajarilayotgan ishlar haqida ham gapirdi.
“Yoshlarni qo‘llab-quvvatlash va aholi salomatligini mustahkamlash yili” davlat dasturi doirasida respublika bo‘yicha 3-4 yoshdagi barcha bolalarni poliomiyelit kasalligiga va 12-13 yoshdagi barcha o‘smir qizlarni saratoniga qarshi emlash ishlari uchun 1 million dollar mablag‘ yo‘naltirildi. Shuningdek, neyrosensor karlik yoki zaif eshitadigan bolalarda koxlear implantatlardan foydalangan holda operatsiyalar o‘tkazildi.
Ijtimoiy himoyaga muhtoj bolalarning ta’lim olishi va kasb egallashiga ko‘maklashish, og‘ir kasallikka chalingan bolalarni davolash maqsadida Bolalarni qo‘llab-quvvatlash fondi tashkil etish hamda uning maqsadlari amalga oshirilishini moliyalashtirish uchun davlat byudjetidan 100 milliard so‘m ajratildi”, – dedi parlament yuqori palatasi rahbari.
Izoh (0)