Ўзбекистонда 2021 йилда 800 нафарга яқин етим ва ота-она қарамоғидан маҳрум бўлган болалар уй-жой ва яшаш учун жиҳозлар билан таъминланган. Бу ҳақда Сенат раиси Танзила Норбоева Ўзбекистоннинг Бола ҳуқуқлари тўғрисидаги конвенцияга қўшилганининг 30 йиллигига оид давра суҳбатида маълум қилди, дея хабар бермоқда «Дарё» мухбири.
Йиғилишда Танзила Норбоева етим ва ота-она қарамоғидан маҳрум бўлган болаларни давлат томонидан қўллаб-қувватлаш борасида бажарилаётган ишлар ҳақида гапирди.
Бугунги кунда 20 та меҳрибонлик муассасаси, хусусан, 13 та меҳрибонлик уйи, 4 та болалар шаҳарчаси ва 3 та болалар уйи фаолияти тугатилди. Уларда тарбияланаётган жами 2 минг 161 нафар тарбияланувчи ўз оиласи ва яқин қариндошларига, оилавий болалар уйларига, таълим муассасаларига ўтказилди. Эътиборли жиҳати, 134 та оилавий болалар уйларида 839 нафар тарбияланувчи мавжуд бўлиб, мазкур оилавий уйларнинг 130 таси ўтган бир йил давомида ташкил қилинган. Оилавий болалар уйларидаги 839 нафар боланинг 719 нафари меҳрибонлик уйидан, 18 нафари болалар уйидан, 24 нафари ИИБ вояга етмаганлар ижтимоий марказидан, 45 нафари ҳокимлик қарори билан қабул қилинган.Аввалроқ Сенат раиси сўнги уч йил ичида Сурия, Ироқ ва Афғонистонда оғир аҳволга тушиб, чорасиз қолган 438 нафар аёл ва болалар Ўзбекистонга олиб келинганини маълум қилганди.Бугунги кунда мамлакатимизда 3 та меҳрибонлик муассасасида 270 нафар, 3 та «СОС - Ўзбекистон болалар маҳаллалари»да 173 нафар, 10 та болалар уйларида («Дом малютки») 319 нафар бола тарбияланмоқда.
Ўтган йилдан бошлаб мамлакатимизда етим ва ота-она қарамоғидан маҳрум бўлган болаларни уй-жой билан таъминлаш тизими жорий этилди. Биргина 2021 йилда 800 нафарга яқин етим ва ота-она қарамоғидан маҳрум бўлган болалар уй-жой ҳамда яшаш учун тўлиқ жиҳозлар билан таъминланди. Бу жараён жорий йилда ҳам давом эттирилмоқда. Шунингдек, етим болалар ва ота-она қарамоғидан маҳрум бўлган болаларнинг муаммоларини ўрганиш ҳамда ҳал этиш, уларнинг орзу-истакларини рўёбга чиқаришга кўмаклашиш мақсадида «Меҳр дафтари» жамғармаси ташкил қилиниб, 70 миллиард сўм маблағ шакллантирилди.
Танзила Норбоева, Сенат раиси.
Изоҳ (0)