Buyuk Britaniyaning Kembrij universiteti olimlari ekspeditsiya davomida Qirg‘izistonda lolaning yangi va noodatiy turini aniqladi. Ma’lumot universitet saytida e’lon qilindi.
Uzunligi 10 dan 19 santimetrgacha bo‘lgan o‘simlik tog‘li To‘qto‘g‘il hududida topilgan, shuning uchun unga To‘qto‘g‘ul (tulipa toktogulica) nomi berilgan. Olimlar guruhiga Kembrij universiteti botanika bog‘i kuratori Sem Brokington, O‘simlik va hayvonot dunyosini saqlash xalqaro assotsiatsiyasi tadqiqotchisi Devid Gill, Qirg‘iziston Milliy fanlar akademiyasining lola bo‘yicha mutaxassislari kiritilgan. Bu lolalarning qanday rivojlangani va ularni tabiiy muhitda qanday qilib yaxshi saqlashni tushunishga qaratilgan loyihaning bir qismi hisoblanadi.
“Mazkur kashfiyot juda hayajonli bo‘ldi. Dastavval qizil chiziqli tashqi gulbarglari bilan yorqin sariq ko‘rinishdagi yovvoyi lola boshqa o‘simlik turlarga o‘xshardi. Biroq Kembrij universitetining o‘simlikshunoslik fakultetida o‘tkazilgan DNK testi bu lolalarning yangi turi ekanini tasdiqladi”, — deydi ekspeditsiya a’zosi, Kembrij fanlari doktori Brett Uilson.
Olimlarning ta’kidlashicha, lolaning yangi turi qo‘riqlash maqomini olgan va endi uni Botanika bog‘ida urug‘lardan ko‘paytirishga harakat qilinadi, bu bir necha yil davom etishi mumkin.
Avvalroq Myanmadagi qahrabo qazib olinadigan kondan topilgan qatron bo‘lagi ichida fanga noma’lum gul aniqlangandi. Topilma Bo‘r davridagi gulli o‘simliklarning Valviloculus turiga kiritilgan, navi esa pleristaminis. Topilgan gul changlatuvchi bo‘lib, u ellikka yaqin chang naychalariga ega. Ularning har biri changlatgich va ingichka ipdan iborat.
Izoh (0)