Indoneziyaning Bali orolida bugun, 15-noyabr kuni G20 (Katta yigirmatalik) davlat rahbarlarining yillik sammiti ochildi.
G20 tarkibiga Argentina, Avstraliya, Braziliya, Buyuk Britaniya, Germaniya, Hindiston, Indoneziya, Italiya, Kanada, Xitoy, Meksika, Rossiya, Saudiya Arabistoni, AQSH, Turkiya, Fransiya, Janubiy Koreya, Janubiy Afrika, Yaponiya va Yevropa Ittifoqi kiradi.
Sammit tashkilotchilari veb-saytida aytilishicha, unda liderlar “hozirgi dolzarb global muammolar, shuningdek, barqaror va inklyuziv o‘sish uchun COVID-19 dan keyingi iqtisodiy va sog‘liqni saqlash sa’y-harakatlarini” muhokama qiladi.
Sammitda G20 yetakchilaridan tashqari, xususan, Jahon sog‘liqni saqlash tashkiloti rahbari Tedros Adxanom Gebreyesus, FIFA prezidenti Janni Infantino, Iqtisodiy hamkorlik va taraqqiyot tashkiloti bosh kotibi Mattias Kormann ham ishtirok etadi.
Sammit ochilishi oldidan Indoneziya prezidenti Joko Vidodo sessiyaga kelgan ishtirokchi-davlatlar delegatsiyalari rahbarlarini shaxsan kutib oldi. Vidodo ochilish paytidagi nutqida barchani birdamlikka chaqirdi va yetakchilar dunyoda yangi sovuq urush boshlanishiga yo‘l qo‘ymasligi kerakligini aytdi.
Qayd etishicha, G20 davlatlari yetakchilarining aksariyati Rossiyaning Ukrainadagi harbiy harakatlarini qoralagan. Ular mazkur urush “insoniyatga ulkan azob keltirib, jahon iqtisodiyotida mavjud beqarorlik omillarini kuchaytirmoqda” degan fikrda. Sammit sessiyalari yopiq eshiklar ortida bo‘lib o‘tmoqda
G20 ga a’zo bo‘lmasa-da, sammitga Ukraina prezidenti Vladimir Zelenskiy ham taklif qilingan. Dastlab Zelenskiy agar G20 sammitida Rossiya prezidenti Vladimir Putin ishtirok etsa, unda qatnashishdan bosh tortishini ma’lum qilgandi.
Keyinroq Kreml ish jadvali va Rossiyada bo‘lish zarurati bilan bog‘liq holda Vladimir Putin G20 da qatnashmasligini ma’lum qildi. Bloomberg qayd etishicha, Putin Ukraina bilan mojaro fonidan boshqa davlat yetakchilarining “sovuq nigohlaridan qochish” uchun sammitda qatnashishdan bosh tortgan. Uning o‘rniga Rossiya delegatsiyasiga mamlakat tashqi ishlar vaziri Sergey Lavrov boshchilik qilmoqda.
Zelenskiy sammitda onlayn qatnashmoqda.
Izoh (0)