Индонезиянинг Бали оролида бугун, 15 ноябрь куни G20 (Катта йигирматалик) давлат раҳбарларининг йиллик саммити очилди.
G20 таркибига Аргентина, Австралия, Бразилия, Буюк Британия, Германия, Ҳиндистон, Индонезия, Италия, Канада, Хитой, Мексика, Россия, Саудия Арабистони, АҚШ, Туркия, Франция, Жанубий Корея, Жанубий Африка, Япония ва Европа Иттифоқи киради.
Саммит ташкилотчилари веб-сайтида айтилишича, унда лидерлар «ҳозирги долзарб глобал муаммолар, шунингдек, барқарор ва инклюзив ўсиш учун COVID-19 дан кейинги иқтисодий ва соғлиқни сақлаш саъй-ҳаракатларини» муҳокама қилади.
Саммитда G20 етакчиларидан ташқари, хусусан, Жаҳон соғлиқни сақлаш ташкилоти раҳбари Тедрос Адханом Гебрейесус, ФИФА президенти Жанни Инфантино, Иқтисодий ҳамкорлик ва тараққиёт ташкилоти бош котиби Маттиас Корманн ҳам иштирок этади.
Саммит очилиши олдидан Индонезия президенти Жоко Видодо сессияга келган иштирокчи-давлатлар делегациялари раҳбарларини шахсан кутиб олди. Видодо очилиш пайтидаги нутқида барчани бирдамликка чақирди ва етакчилар дунёда янги совуқ уруш бошланишига йўл қўймаслиги кераклигини айтди.
Қайд этишича, G20 давлатлари етакчиларининг аксарияти Россиянинг Украинадаги ҳарбий ҳаракатларини қоралаган. Улар мазкур уруш «инсониятга улкан азоб келтириб, жаҳон иқтисодиётида мавжуд беқарорлик омилларини кучайтирмоқда» деган фикрда. Саммит сессиялари ёпиқ эшиклар ортида бўлиб ўтмоқда
G20 га аъзо бўлмаса-да, саммитга Украина президенти Владимир Зеленский ҳам таклиф қилинган. Дастлаб Зеленский агар G20 саммитида Россия президенти Владимир Путин иштирок этса, унда қатнашишдан бош тортишини маълум қилганди.
Кейинроқ Кремль иш жадвали ва Россияда бўлиш зарурати билан боғлиқ ҳолда Владимир Путин G20 да қатнашмаслигини маълум қилди. Bloomberg қайд этишича, Путин Украина билан можаро фонидан бошқа давлат етакчиларининг «совуқ нигоҳларидан қочиш» учун саммитда қатнашишдан бош тортган. Унинг ўрнига Россия делегациясига мамлакат ташқи ишлар вазири Сергей Лавров бошчилик қилмоқда.
Зеленский саммитда онлайн қатнашмоқда.
Изоҳ (0)