Xitoy raisi Si Szinpin va AQSH prezidenti Jo Bayden 14-noyabr kuni Indoneziyada muzokara o‘tkazdi. Bu haqda RIA Novosti xabar berdi.
Ikki davlat rahbarlari yetakchi sifatida yuzma-yuz ilk uchrashuvni o‘tkazmoqda. Ular 2015-yilda ham uchrashgan, ammo u vaqtda Bayden AQSH prezidenti bo‘lmagandi. Muzokara davomida Xitoy rahbari barcha davlatlar bilan tinchlik va global barqarorlikni mustahkamlash uchun hamkorlik qilish zarurligini bildirdi. U ikki tomonlama strategik masalalar bo‘yicha aniq muzokaralar, mintaqaviy va global vaziyatni muhokama qilishga tayyor ekanini aytdi.
“Ikki davlat yetakchilari sifatida, menimcha, Xitoy va AQSH kelishmovchiliklarni yengib o‘tish, raqobatning ziddiyatga aylanib ketishiga yo‘l qo‘ymaslik va hamkorlikni talab qiladigan dolzarb global masalalarda birgalikda ishlash yo‘llarini topishga qodir ekanini ko‘rsatishga mas’ulmiz”, — dedi Bayden.
Uning fikricha, dunyo iqlim o‘zgarishidan tortib oziq-ovqat xavfsizligigacha bo‘lgan global muammolarni hal qilishda AQSh va Xitoyning asosiy rol o‘ynashini kutmoqda. Bayden AQSH Xitoy bilan bu masalalarda hamkorlik qilishga tayyorligini ta’kidladi.
Eslatib o‘tamiz, Bayden G20 sammitida Tayvan va Ukraina masalasini muhokama qilmoqchi.
“Hech qanday fundamental yon berishga tayyor emasman. Men “qizil chiziqlarimizni” belgilashni istayman, Xitoyning eng muhim manfaatlarini tushunmoqchiman ... va bizning manfaatlarimiz bir-biriga zid keladimi yoki yo‘qligini aniqlamoqchiman”, — degan edi Bayden.
Amerika yetakchisi Si Szinpin bilan Tayvan hujumga uchragan taqdirda, AQSHning orolni himoya qilish niyati haqida gaplashmoqchiligini ilgari surgandi.
Izoh (0)