O‘zbekistonda MTT xodimlarining maoshini oshirish bo‘yicha taklif ishlab chiqilgani ma’lum qilindi. Bu uchun davlat budjetidan o‘rtacha 2,9 trillion so‘m talab etiladi.
Statistik ma’lumotlarga ko‘ra, O‘zbekistonda 3-7 yoshli 2 million 800 ming nafar bola bo‘lib, shundan 1 million 959 mingi maktabgacha yoshdagi bolalar sanaladi. Joriy yilning birinchi yarmida 3-7 yoshli bolalarning maktabgacha ta’lim bilan qamrab olish darajasi 69,5 foizga va 6 yoshli bolalarning maktabga tayyorlov tizimi bilan qamrovi 84 foizga yetkazilgan.
Yana bir jihat borki, bolalarning intellektual, shaxsiy va jismoniy rivojlanishini ta‘minlashda hissa qo‘shayotgan maktabgacha ta’lim muassasasi tarbiyachilarining ish haqi miqdori nisbatan past.
Xo‘sh, qanday hollarda bog‘chalarda xodimlarning maoshiga qo‘shimcha haq to‘lanishi mumkin? Davlat maktabgacha ta’lim tashkilotlari xodimlarining maoshlari oshiriladimi?
Mazkur savollarga Maktabgacha ta’lim vazirligining Moliyaviy-iqtisodiy rivojlanishni rejalashtirish boshqarmasi boshlig‘i o‘rinbosari Sherzod Pardayev quyidagicha javob berdi:
— Maktabgacha ta’lim tashkilotlarini yuqori malakali kadrlar bilan ta’minlash bugunning dolzarb masalasidan biridir. Pedagog kadrlar uchun ularning mehnatiga munosib haq to‘lash sohadagi ishlar samaradorligiga ijobiy ta’sir ko‘rsatadi. Ammo afsuski, olib borilayotgan chora-tadbirlarga qaramasdan, soha xodimlarining maoshini oshirish masalasi tizimdagi eng dolzarb muammolardan biri bo‘lib qolmoqda.Maktabgacha ta’lim vazirligi tomonidan davlat maktabgacha ta’lim tashkiloti direktori, pedagog xodimlari va tarbiyachi yordamchisi lavozimi maoshini ikki bosqichda oshirish bo‘yicha taklif ishlab chiqilgan.
Shuningdek, qonunchilikka ko‘ra, davlat maktabgacha ta’lim tashkilotlari xodimlariga bajarilgan ishlar natijasiga qarab, hisobot davri yakunida, shuningdek, yubiley va bayramlarda “Xodimlarni moddiy rag‘batlantirish maxsus jamg‘armasi” hisobidan mukofot pullari to‘lab berilishi belgilab qo‘yilgan.
MTT xodimlariga beriladigan mukofotning miqdori xodim tomonidan bajarilgan ishlar samaradorligiga mutanosib ravishda belgilanadi. Xodimning lavozim maoshiga har oylik qo‘shimcha haq xodim faoliyatining natijalari asosida maktab yoshigacha bo‘lgan bolalarni tarbiyalashga oid har bir ishlab chiqilgan va amaliyotga joriy qilingan ilmiy-metodik qo‘llanma, ilmiy-tahliliy uslublar uchun lavozim maoshiga nisbatan 30 foizgacha, ta’lim va tarbiya sohasida tegishli tashkilot bilan bog‘liq ilmiy maqola nashr qilganligi uchun jurnalning darajasi va muhimligidan kelib chiqqan holda milliy ilmiy jurnallardagi nashr uchun lavozim maoshiga nisbatan 15 foizgacha hamda xalqaro jurnallarda e’lon qilingan har bir maqola uchun mualliflarga lavozim maoshiga nisbatan 30 foizgacha belgilanadi.
Xodimning ko‘rik-tanlovlardagi ishtiroki uchun uning lavozim maoshiga nisbatan tuman va viloyat miqyosdagi natijalar uchun 15 foizgacha, respublika miqyosdagi natijalar uchun 20 foizgacha va o‘yin tamoyiliga asoslangan zamonaviy mashg‘ulotlarni tashkil qilganligi uchun 15 foizgacha miqdorda bir martalik qo‘shimcha haq to‘lanadi. Tarbiyalanuvchilarni ilm-fanga qiziqishini oshirishga hissa qo‘shgan tarbiyachi ham 20 foizgacha bo‘lgan miqdorda maoshiga bir martalik qo‘shimcha haq olishi mumkin.
Davlat maktabgacha ta’lim tashkilotlarida bir stavkada faoliyat ko‘rsatuvchi tarbiyachining maoshi uning malaka toifasiga qarab 1 million 506 ming 229 so‘mdan 2 million 46 ming 822 so‘mgacha tabaqalashtirilgan. Jumladan, o‘rta maxsus ma’lumotli tarbiyachining bazaviy tarif stavkasi 1 million 506 ming 229 so‘m, oliy ma’lumotli tarbiyachining bazaviy tarif stavkasi 1 million 631 ming 200 so‘mni tashkil etadi.
Bolalarni boshlang‘ich ta’limga majburiy bir yillik tayyorlash guruhlarida faoliyat ko‘rsatuvchi oliy ma'lumotli tarbiyachi lavozim maoshi uning malaka toifasiga qarab 2 million 341 ming 248 so‘mdan 2 million 840 ming 329 so‘mgacha tabaqalashtirilgan. Jumladan, oliy ma’lumotli tarbiyachi bazaviy tarif stavkasi 2 million 341 ming 248 so‘m, birinchi toifali tarbiyachi bazaviy tarif stavkasi 2 million 507 ming 193 so‘mni tashkil etadi. Tarbiyachi yordamchisining lavozim maoshi xodim pedagogik ma'lumotga ega bo‘lganda 1 million 374 ming 624 so‘m, nopedagogik ma'lumotga ega bo‘lganda 1 million 145 ming 520 so‘mni tashkil etadi.
Davlat maktabgacha ta’lim tashkilotlarida xodimlarning lavozim maoshlari respublika o‘rtacha ko‘rsatkichidan sezilarli darajada pastligini inobatga olib, vazirlik tomonidan xodimlarning lavozim maoshlarini oshirish bo‘yicha takliflar ishlab chiqilgan. Unga ko‘ra, davlat maktabgacha ta'lim tashkilotlaridagi o‘qituvchi, logoped, defektolog, metodist va tarbiyachilar lavozim maoshlarini umumta’lim maktabi o‘qituvchisi lavozim maoshiga bosqichma-bosqich tenglashtirish nazarda tutilgan.
Mazkur taklif Moliya vazirligi va boshqa manfaatdor vazirliklar tomonidan ma’qullangan taqdirda Hukumatga tegishli hujjat loyihasi kiritiladi.
Ma’lumot o‘rnida ta’kidlash lozimki, dastlabki hisob-kitoblarga ko‘ra, davlat maktabgacha ta’lim tashkilotlari direktori, pedagog xodimlari va tarbiyachi yordamchisi lavozim maoshlarini qayd etilgan miqdorlarda oshirish uchun davlat byudjetidan o‘rtacha 2,9 trillion so‘m mablag‘ talab etiladi.
Izoh (0)