Ukraina prezidenti Vladimir Zelenskiy 14-noyabr kuni Xersonga tashrif buyurdi. Rossiya prezidenti matbuot kotibi Dmitriy Peskov esa mazkur tashrifga munosabat bildirdi. Bu haqda RIA Novosti xabar berdi.
Kreml rasmiysi Zelenskiyning ozod qilingan Xersonga kelgani haqidagi xabarlarga izoh berishdan bosh tortdi.
“Biz buni izohsiz qoldiramiz. Bu Rossiyaning hududi ekanini bilasiz”, — deydi Rossiya prezidenti matbuot kotibi jurnalistlarga.
14-noyabr kuni jahon va Ukraina OAVlari Ukraina prezidenti Vladimir Zelenskiy Xersonga kelgani haqida xabar tarqatdi. Keyinchalik shahardan olingan foto va video dalillar paydo bo‘ldi. Ularni Zelenskiyning o‘zi Telegram kanalida e’lon qildi.
Xerson fevral oyida mamlakatga bosqin boshlanganidan beri Rossiya armiyasi tomonidan qo‘lga kiritilgan Ukrainaning yagona viloyati edi. Sentabr oyi oxirida Kreml Ukrainaning Xerson va Zaporojye viloyatlarining bosib olingan qismlari, shuningdek, o‘zini o‘zi e’lon qilgan Donetsk va Lugansk xalq respublikalari hududlarini rasman anneksiya qildi.
9-noyabr kuni Rossiya Mudofaa vazirligi qo‘shinlarni Xersondan Dneprning chap qirg‘og‘iga olib chiqishni e‘lon qildi va buni shaharni to‘liq ta‘minlashning iloji yo‘qligi va rus askarlarining hayotini saqlab qolish istagi bilan izohladi. 11-noyabr kuni ertalab vazirlik Xersondan chekinish haqida xabar berdi. O‘sha kuni tushdan keyin ukrainalik harbiylarning birinchi bo‘linmalari shaharga kirdi. Zelenskiy Xersonning ozod qilinishi haqida nutq so‘zlab, bu tarixiy kun ekanini ta’kidladi.
Izoh (0)