Хитой раиси Си Цзиньпин ва АҚШ президенти Жо Байден 14 ноябрь куни Индонезияда музокара ўтказди. Бу ҳақда РИА Новости хабар берди.
Икки давлат раҳбарлари етакчи сифатида юзма-юз илк учрашувни ўтказмоқда. Улар 2015 йилда ҳам учрашган, аммо у вақтда Байден АҚШ президенти бўлмаганди. Музокара давомида Хитой раҳбари барча давлатлар билан тинчлик ва глобал барқарорликни мустаҳкамлаш учун ҳамкорлик қилиш зарурлигини билдирди. У икки томонлама стратегик масалалар бўйича аниқ музокаралар, минтақавий ва глобал вазиятни муҳокама қилишга тайёр эканини айтди.
«Икки давлат етакчилари сифатида, менимча, Хитой ва АҚШ келишмовчиликларни енгиб ўтиш, рақобатнинг зиддиятга айланиб кетишига йўл қўймаслик ва ҳамкорликни талаб қиладиган долзарб глобал масалаларда биргаликда ишлаш йўлларини топишга қодир эканини кўрсатишга масъулмиз», — деди Байден.
Унинг фикрича, дунё иқлим ўзгаришидан тортиб озиқ-овқат хавфсизлигигача бўлган глобал муаммоларни ҳал қилишда АҚШ ва Хитойнинг асосий рол ўйнашини кутмоқда. Байден АҚШ Хитой билан бу масалаларда ҳамкорлик қилишга тайёрлигини таъкидлади.
Эслатиб ўтамиз, Байден G20 саммитида Тайван ва Украина масаласини муҳокама қилмоқчи.
«Ҳеч қандай фундаментал ён беришга тайёр эмасман. Мен «қизил чизиқларимизни» белгилашни истайман, Хитойнинг энг муҳим манфаатларини тушунмоқчиман ... ва бизнинг манфаатларимиз бир-бирига зид келадими ёки йўқлигини аниқламоқчиман», — деган эди Байден.
Америка етакчиси Си Цзиньпин билан Тайван ҳужумга учраган тақдирда, АҚШнинг оролни ҳимоя қилиш нияти ҳақида гаплашмоқчилигини илгари сурганди.
Изоҳ (0)