АҚШ Украинага жанговар тўқнашувларда қатнашиш учун қурол-яроғ етказиб беришда давом этади. Бу ҳақда АҚШ президентининг миллий хавфсизлик бўйича ёрдамчиси Жейк Салливан маълум қилди.
«АҚШнинг позицияси ўзгармайди, олти ой аввал қандай бўлса, шундай бўлиб қолади. Биз Украинанинг жанглар майдонидаги позицияси мустаҳкамланиши учун бор имкониятимизни ишга соламиз», — деди у.
Президент ёрдамчиси қўшимча қилишича, АҚШ маъмурияти Украинадаги низони суверенитет ва ҳудудий яхлитлик тамойиллари асосида тартибга солиш мумкин деб ҳисоблайди.
Вашингтон Киевга босим ўтказиб, унга нима қилиш кераклиги ҳақида буйруқ бермайди, чунки фақат Украина томонигина «музокараларни қачон ва қандай ўтказишни исташи»ни ҳал қила олади.
Январь ойидан буён АҚШ Украина хавфсизлик соҳасига ёрдам сифатида 19,3 миллиард доллар ажратди, шунинг 18,6 миллиарди Россия қўшинлари бу мамлакатга кирганидан кейин берилган. Вашингтон томонидан кўмак доирасида Киевга, шу жумладан, 4 мингта юқори аниқликдаги артиллерия снарядлари, 8500 дан ортиқ Javelin танкка қарши тизимлари ва 38 мингдан зиёд бошқа танкка қарши тизимлар, 142 та 155 миллиметрли гаубицалар, 924 мингта 155 миллиметрли артиллерия снарядлари етказилган.
Россия Украина ҳукуматига қурол-яроғ етказиб берилаётганини танқид қилади. Кремль Москва ўз мақсадларига эришишини таъкидлаб, бундай хатти-ҳаракатлар низони фақат чўзишга хизмат қилишини айтмоқда.
Изоҳ (0)