Samarqandda bo‘lib o‘tgan II O‘zbekiston iqtisodiy forumi doirasida Avesta Investment Group direktori Karen Srapionov “Daryo” muxbiriga intervyu berdi.
Suhbatda O‘zbekistondagi xususiylashtirish jarayoni, rejalashtirilayotgan IPO’lar, buning kompaniya va oddiy odamlarga qanday foydasi borligi, shuningdek uni iqtisodiyotdagi o‘rni haqida so‘z bordi.
Avvalo, o‘zingizni tanishtirib, faoliyatingiz va kompaniyangiz haqida qisqacha ma’lumot bersangiz?
Men Karen Srapionov Avesta Investment Group direktoriman. Avesta mahalliy inevstment bank kompaniyasi hisoblanadi. Biz korporativ moliya, xorijiy investitsiyalarni jalb qilish, xususiylashtirish bitimlari bilan shug‘ullanamiz.
IPO aslida nima ? U kompaniya va oddiy odamlarga qanday foyda keltirishini tushuntirib bera olasizmi?
Albatta. IPO, asosan, kompaniya qo‘shimcha aksiyalarni investorlarga sotmoqchi ekanligini anglatadi. Bu kompaniyaga pul to‘plashda yordam beradi. Investorlar uchun, albatta, bu kompaniyaning bir qismiga aylanish, aksiyalarni sotib olish, dividend olish, kompaniyaning o‘sishi uchun pul ishlash imkoniyatidir.
Agar narxlar ko‘tarilib, kompaniya boshqalarga nisbatan tezroq o‘sayotgan bo‘lsa investorlar undan yaxshi foyda oladi.
O‘zbekistonda IPO o‘tkazish muhitini qanday baholaysiz?
Albatta, hozir O‘zbekistonda IPO jarayonini boshlash uchun eng to‘g‘ri vaqt. Hamma soha o‘sib bormoqda, O‘zbekistondagi kompaniyalarni sotib olishga mahalliy va xalqaro investorlarning katta qiziqishi bor.
To‘g‘ri, bizda infratuzilma va boshqa narsalar bilan bog‘liq muammolar ham mavjud. Ammo moliya vazirligi va bozor ishtirokchilarining sa’y-harakatlari tufayli vaziyat va infratuzilma yaxshilanmoqda.
Shunday ekan, “O‘zmetkombinat” va “Qishloq qurilish bank” ning IPO’lari butun mamlakat bo‘ylab ushbu bozorni rivojlantirishga yordam beradi, degan umiddaman.
O‘zbekistonda o‘tkazilishi rejalashtirilgan ushbu ikki IPO haqida ma’lumot bersangiz? Ular hozir qaysi bosqichda?
Ular bozordagi ilk IPO’lardan hisoblanadi. “Uzmetkombinat” birinchilardan bo‘lib buni amalga oshirayotgan kompaniyalardan. Albatta, u O‘zbekistondagi eng qiziqarli kompaniyalardan biri bo‘lib, hozirgi paytda sezilarli darajada erkin float aksiyalariga ega. Bu IPO’ni jadallashtirishga va likvidlikni oshirishga yordam beradi.
“Qishloq qurilish bank”i — aksiyalari ochiq bozorga chiqariladigan birinchi davlat bankidir. Shunday qilib, ikkala kompaniyada ham IPO o‘rta bosqichda. Biz tadqiqot olib borish, materiallar tayyorlash va baholashni amalga oshirishda jarayonni qaysi davrda boshlashimiz mumkinligini aniqlashga harakat qilyapmiz.
So‘nggi yillarda O‘zbekistonda kompaniyalar tomonidan IPO’lar ko‘paymoqda. Sizningcha, hozirgacha bunga nima to‘sqinlik qilgan?
Albatta, bu juda yaxshi savol bo‘ldi. Bizda ko‘p yillar davomida IPO haqida gapirib kelindi. Endidan esa jarayon boshlanmoqda.
Agar yangiliklarni kuzatib borayotgan bo‘lsangiz, so‘nggi 2—3 yil ichida hukumat tomonidan ushbu bozorni rivojlantirish bo‘yicha huquqiy o‘zgarishlar va tashabbuslarning muhimligini ko‘rgansiz. Menimcha, bunda asosiy omil IPO jarayonini boshlash uchun siyosiy qarashlar, shuningdek kompaniyalarni bunga undashdan iborat.
Izoh (0)