Hyatt Regency mehmonxonasi 87 million dollarga xususiylashtiriladi

Hyatt Regency mehmonxonasini balansda saqlovchi “Poytaxt qurilish va xizmat” kompaniyasining ustav kapitalidagi 100 foiz davlat ulushini sotish bo‘yicha kelishuvga erishildi. Bu haqda Davlat aktivlarini boshqarish agentligi (DABA) xabar bermoqda. 

Ma’lum qilinishicha, mehmonxona 87 million dollarga Abu Dhabi Uzbek Investment’ga sotiladi. 

Sotuv jarayonida KPMG Valuation and Consulting xalqaro konsalting kompaniyasi DABAning xususiylashtirish bo‘yicha konsultanti vazifasini bajardi. 

Aksiyalar paketini mustaqil baholash xalqaro baholovchi kompaniya PricewaterhouseCoopers tomonidan amalga oshirildi. 

Bitim talabgor tomonidan sotib olish to‘loviga qo‘shimcha ravishda mehmonxonani rivojlantirish uchun 12 mln dollar miqdorida investitsiya kiritish majburiyati bilan birga to‘lovni to‘liq biryo‘la to‘lash orqali amalga oshiriladi.

Abu Dhabi Uzbek Investment (BAA—O‘zbekison) 1 mlrd dollarga teng kapitalga ega bo‘lgan investitsiya kompaniyasi hisoblanadi.

Hyatt Regency mehmonxonasining xususiylashtirilishi fevral oyida e’lon qilingan edi. 

Mehmonxonaning 2018-yilda sof foydasi 11,9 mlrd so‘mni, 2019-yilda 53,5 mlrd so‘mni tashkil etgan. 2020-yilda koronavirus tufayli foyda ko‘rilmagan. 2021-yil uchun ma’lumotlar yo‘q. 2022-yilning 9 oyida mehmonxonaning sof foydasi 40 milliard so‘mni (taxminan 3,6 million dollar) tashkil qilgan.