Самарқандда бўлиб ўтган II Ўзбекистон иқтисодий форуми доирасида Avesta Investment Group директори Карен Срапионов «Дарё» мухбирига интервью берди.
Суҳбатда Ўзбекистондаги хусусийлаштириш жараёни, режалаштирилаётган IPO’лар, бунинг компания ва оддий одамларга қандай фойдаси борлиги, шунингдек уни иқтисодиётдаги ўрни ҳақида сўз борди.
Аввало, ўзингизни таништириб, фаолиятингиз ва компаниянгиз ҳақида қисқача маълумот берсангиз?
Мен Карен Срапионов Avesta Investment Group директориман. Авеста маҳаллий иневстмент банк компанияси ҳисобланади. Биз корпоратив молия, хорижий инвестицияларни жалб қилиш, хусусийлаштириш битимлари билан шуғулланамиз.
IPO аслида нима ? У компания ва оддий одамларга қандай фойда келтиришини тушунтириб бера оласизми?
Албатта. IPO, асосан, компания қўшимча акцияларни инвесторларга сотмоқчи эканлигини англатади. Бу компанияга пул тўплашда ёрдам беради. Инвесторлар учун, албатта, бу компаниянинг бир қисмига айланиш, акцияларни сотиб олиш, дивиденд олиш, компаниянинг ўсиши учун пул ишлаш имкониятидир.
Агар нархлар кўтарилиб, компания бошқаларга нисбатан тезроқ ўсаётган бўлса инвесторлар ундан яхши фойда олади.
Ўзбекистонда IPO ўтказиш муҳитини қандай баҳолайсиз?
Албатта, ҳозир Ўзбекистонда IPO жараёнини бошлаш учун энг тўғри вақт. Ҳамма соҳа ўсиб бормоқда, Ўзбекистондаги компанияларни сотиб олишга маҳаллий ва халқаро инвесторларнинг катта қизиқиши бор.
Тўғри, бизда инфратузилма ва бошқа нарсалар билан боғлиқ муаммолар ҳам мавжуд. Аммо молия вазирлиги ва бозор иштирокчиларининг саъй-ҳаракатлари туфайли вазият ва инфратузилма яхшиланмоқда.
Шундай экан, «Ўзметкомбинат» ва «Қишлоқ қурилиш банк» нинг IPO’лари бутун мамлакат бўйлаб ушбу бозорни ривожлантиришга ёрдам беради, деган умиддаман.
Ўзбекистонда ўтказилиши режалаштирилган ушбу икки IPO ҳақида маълумот берсангиз? Улар ҳозир қайси босқичда?
Улар бозордаги илк IPO’лардан ҳисобланади. «Узметкомбинат» биринчилардан бўлиб буни амалга ошираётган компаниялардан. Албатта, у Ўзбекистондаги энг қизиқарли компаниялардан бири бўлиб, ҳозирги пайтда сезиларли даражада эркин флоат акцияларига эга. Бу IPO’ни жадаллаштиришга ва ликвидликни оширишга ёрдам беради.
«Қишлоқ қурилиш банк»и — акциялари очиқ бозорга чиқариладиган биринчи давлат банкидир. Шундай қилиб, иккала компанияда ҳам IPO ўрта босқичда. Биз тадқиқот олиб бориш, материаллар тайёрлаш ва баҳолашни амалга оширишда жараённи қайси даврда бошлашимиз мумкинлигини аниқлашга ҳаракат қиляпмиз.
Сўнгги йилларда Ўзбекистонда компаниялар томонидан IPO’лар кўпаймоқда. Сизнингча, ҳозиргача бунга нима тўсқинлик қилган?
Албатта, бу жуда яхши савол бўлди. Бизда кўп йиллар давомида IPO ҳақида гапириб келинди. Эндидан эса жараён бошланмоқда.
Агар янгиликларни кузатиб бораётган бўлсангиз, сўнгги 2—3 йил ичида ҳукумат томонидан ушбу бозорни ривожлантириш бўйича ҳуқуқий ўзгаришлар ва ташаббусларнинг муҳимлигини кўргансиз. Менимча, бунда асосий омил IPO жараёнини бошлаш учун сиёсий қарашлар, шунингдек компанияларни бунга ундашдан иборат.
Изоҳ (0)