Rossiya prezidenti Vladimir Putin 15-16-noyabr kunlari Indoneziyaning Bali orolida bo‘lib o‘tadigan G20 sammitiga bormaydi, deb yozadi Bloomberg.
Agentlik ma’lumotlariga ko‘ra, Kreml Rossiyaning Ukrainaga bostirib kirishi bo‘yicha sammitda Putin va boshqa yetakchilar o‘rtasida “potensial qarama-qarshilik” dan qochmoqchi. Xususan, Bloomberg urush boshlanganidan keyin Putinni harbiy jinoyatchi deb atagan AQSH prezidenti Jo Baydenni tilga oldi.
Indoneziyadagi sammitga Rossiya prezidenti o‘rniga tashqi ishlar vaziri Sergey Lavrov boradi, deb xabar berdi Bloomberg manbalaridan biri.
Lavrovning Balida Putin o‘rnini egallashi mumkinligi haqida 8-noyabr kuni “Vedomosti” xabar bergan. Shu bilan birga, Indoneziya rasmiylari Putinning onlayn ishtirokini taxmin qilgan. Rasmiy ravishda Kreml Rossiyaning G20 sammitidagi ishtiroki formatini shu hafta oxirigacha e’lon qilishi kutilmoqda.
Jo Bayden mart oyida Rossiyani Ukrainaga bostirib kirishi sababli G20 dan chiqarib tashlashni taklif qilgan edi. Buning o‘rniga bu yil G20 ga raislik qilayotgan Indoneziya prezidenti sammitga Rossiya va Ukraina (G20 a’zosi emas) rahbarlarini taklif qildi.
Ukraina prezidenti Vladimir Zelenskiy avvalroq Putin ishtirokida sammitga bormasligini aytgan edi. 8-noyabr kuni Zelenskiyning matbuot kotibi Sergey Nikiforov Ukraina yetakchisi sammitda katta ehtimol bilan onlayn ishtirok etishini bildirdi.
Izoh (0)