Fransiya prezidenti Emmanuel Makron neft tufayli Venesuela prezidenti Nikolas Maduroga munosabati keskin o‘zgargani uchun ikkiyuzlamachilikda ayblandi, deya xabar qiladi mahalliy OAV.
“7-noyabr, dushanba kuni Misrning ekologik sammiti doirasida ikki davlat rahbarlari o‘rtasida bir yarim daqiqalik suhbat bo‘lib o‘tdi, biroq bunisi Makronning 2019-yilda Maduroni ‘noqonuniy yetakchi’ deb atagan dastlabki izohlaridan keskin farq qiladi”, — deb yozadi France24.
Bundan tashqari, LFI partiyasi rahbari Jan-Lyuk Melenshon ham mamlakat prezidentining o‘zgargan yondashuviga e’tibor qaratdi.
“Neftga bo‘lgan ehtiyoj odamlarni odobli qiladi”, — deb yozdi u Twitter’dagi sahifasida.
O‘z navbatida Liberation gazetasi buni Maduro bilan munosabatlardagi 180 graduslik burilish deb atadi.
6-noyabr, yakshanba kuni Misrning Sharm ash-Shayx kurortida COP27 ekologik sammiti ochildi. France24 xabariga ko‘ra, Fransiya prezidenti Venesuela bilan uzoq muddatli o‘zaro manfaatli munosabatlar o‘rnatish istagini bildirgan.
Maduro, shuningdek, suhbat chog‘ida Fransiya Janubiy Amerika mintaqasida ijobiy rol o‘ynashi kerakligini va Makron bilan “ko‘plab umumiy do‘stlari” borligini aytdi.
AQSH, Fransiya va boshqa Yevropa Ittifoqi davlatlari Xuan Guaydoni amaldagi prezident deb hisoblab, 2018-yilda Maduroning qayta saylanishini qonuniy deb tan olishmagan. Makron o‘z navbatida Maduroni noqonuniy hukmdor deb atab, Venesuelada “demokratiyani tiklash”ga chaqirgan edi.
Izoh (0)