Eron futboli afsonasi Ali Dayi o‘limga hukm qilingani aytilmoqda
Eron futbolining afsonasi Ali Dayi o‘lim jazosiga hukm qilindi, deya xabar qilmoqda Ozarbayjonning Report nashri.
Manbaning xorijdagi OAVga tayanib xabar qilishicha, sobiq futbolchi Mahsa Aminiyning o‘limidan keyin yuzaga kelgan norozilik namoyishlarida qatnashgani uchun shu jazoga loyiq ko‘rilgan.
Qayd etilishicha, Dayidan boshqa yana hibsga olingan 15 mingga yaqin odam qatl qilinadi.
Ali Dayi 1988—2007-yillar mobaynida professional futbolchi sifatida faoliyat yuritgan. U Eron va Osiyoning qator klublaridan tashqari Germaniyaning “Bavariya”, “Herta” va “Arminiya” jamoalari sharafini himoya qilgan. 2006—2019-yillarda murabbiylik bilan shug‘ullangan.
Dayi Eron terma jamoasi tarixidagi eng yaxshi to‘purar hisoblanadi. Fors futbolchisi 109 ta goli bilan yaqingacha terma jamoalar tarixidagi eng yaxshi to‘purar bo‘lib turgandi. Uning rekordini 2021-yilda Krishtianu Ronaldu yangiladi.
Mavzuga doir:
- Eronda 14 ming nafar namoyishchi qatl etilishi mumkin
- Ukraina futbol assotsiatsiyasi Eronni jahon chempionatidan chetlashtirishni taklif qildi
- Eronlik bir guruh futbolchi va sportchilar mamlakat terma jamoasini JCH—2022 dan chetlatishni so‘rab, FIFAga murojaat qildi
- Eron ayollar huquqlarini himoya qiluvchi tashkilot FIFAga mamlakatini JCH—2022 dan chetlatishi so‘rab, murojaat yo‘lladi
Erondagi namoyishlarga nima sabab bo‘ldi?
Eronda namoyishlar sentabr o‘rtalarida, 22 yoshli Mahsa Aminiyning o‘limidan keyin boshlandi. Politsiya uni Tehronda metrodan chiqish chog‘ida hijobni noto‘g‘ri o‘ragani uchun hibsga olgan.Keyinroq Aminiyning akasi ma’lum qilishicha, politsiyachilar u bilan “qayta tarbiyalash” ishlarini o‘tkazishga va’da bergan. Politsiya uchastkasidan qiz tez yordam mashinasida olib ketilgan. Shifokorlar qizda yurak xuruji va insult yuz berganini bildirgan, u bir necha kundan keyin vafot etgan. Eron politsiyasi baxtsiz hodisa yuz berganini da’vo qilmoqda.
Eron hukumati fikricha, noroziliklar “islom rejimini zaiflashtirish bo‘yicha dushman strategiyasi”ning bir qismidir, mamlakat armiyasi esa namoyishlar fonida “dushmanlarga qarshi kurashish” va xavfsizlikni ta’minlash niyatida.
Eron oliy yetakchisi Ali Xomanaiy namoyishlar “oddiy eronliklar” tomonidan o‘tkazilmayotganini, balki oldindan rejalashtirilganini aytgandi, shuningdek, u AQSH va Isroilni tartibsizliklarni tashkillashtirishda ayblagandi.
