Агар Киев истамаётган бўлса, АҚШ Украинани Россия билан музокарага киришишга «мажбурламайди». Бу ҳақда АҚШ мудофаа вазирининг сиёсий масалалар бўйича ўринбосари Колин Кол маълум қилди. Шунингдек, унинг сўзларига кўра, Украина Қримни ҳарбий йўл билан қайтариш-қайтармаслик масаласини ўзи ҳал қилиши керак.
Вашингтондаги Мудофаа ёзувчилар гуруҳи (Defense Wритерс Group) билан онлайн учрашувда Колдан АҚШ Украинанинг Қримни босиб олиш ҳаракатларига молиявий ёрдам берадими, деган савол сўралди.
«Украиналиклар ҳарбий мақсадлари билан 23 февралдаги чегараларига қайтмоқчими ёки 2014 йилдаги, буни ўзлари ҳал қилади. Якунда бу уларнинг қарори бўлади», — деб жавоб берди АҚШ Мудофаа вазири ўринбосари. Кол Қримнинг мақоми фақат Россия ва Украина ўртасида муҳокама қилиниши мумкинлигини таъкидлади.
Расмийнинг таъкидлашича, АҚШ мақсади Киев музокарага тайёр бўлган пайтда унинг кучли позицияда туриб иш кўришини таъминлашдан иборат. Колнинг фикрича, келаётган қиш «кенг кўламли ҳужум операциялари»ни ўтказишни мураккаблаштиради, шу боис Украинадаги жанговар ҳаракатлар интенсивлиги камайиши мумкин.
8 ноябрь куни Украина президенти Владимир Зеленский Россия билан тинчлик музокараларини қайта бошлаш учун бир қанча шартларини маълум қилди, жумладан, уларда мамлакат ҳудудий яхлитлигини тиклаш ва барча йўқотишлар учун товон тўлаш илгари сурилган. Politico нашрининг хабар беришича, у АҚШ таъсири остида Россия билан музокаралар бўйича ўз позициясини юмшатган. Аввалроқ ОАВ Оқ уй Украина раҳбариятини Россия билан музокарага тайёрлигини эълон қилишга чақираётгани ҳақида ёзганди.
Изоҳ (0)