Norvegiya qiroli Xarald V va qirolichasi Sonyaning qizi Marta-Luiza Norvegiya malikasi unvonidan va Glyuksburglar qirollik uyi rasmiy vakili bo‘lishdan voz kechishga qaror qildi. Bu haqda qirollik oilasi saytidagi xabarda aytiladi. Iyun oyida Marta-Luiza amerikalik Durek Verrett bilan unashtirilganini e’lon qilgandi, u esa o‘zini oltinchi avloddagi shomon deb ataydi.
“Malika va uning qallig‘i Durek Verrett shaxsiy ishlari va Norvegiya qirollik oilasi o‘rtasidagi chegarani yanada aniqroq qilib chizishni xohlagan bo‘lardi”, — deyiladi bayonotda. Bu, xususan, shuni bildiradiki, malika xayriya tashkilotlari homiysi rolini o‘ynashdan to‘xtaydi.
Malika Instagram orqali aniqlik kiritishicha, u “o‘zining Norvegiya malikasi va xayriya tashkilotlari homiysi sifatidagi rollarini bir-biridan ajratmoqchi”.
Qirol Marta-Luizaning malika unvonini saqlab qolishga qaror qildi. Uning qallig‘i ham to‘ydan keyin qirollik oilasiga kiradi, biroq unga an’anaga muvofiq unvon taqdim etilmaydi. Marta-Luiza ham, Verrett ham oilaviy tadbirlarda qatnashadi.
Verrett va Marta-Luiza ishqiy munosabatlari haqida 2019-yilda e’lon qilgan, malika esa Los-Anjelesga ko‘chib o‘tgan edi.
Durek Verrett 47 yoshda. U shomonlik seanslarini o‘tkazadi, vudu bo‘yicha onlayn-kurslar olib boradi va shu tariqa, “odamlar ongli ravishda, chinakamiga va uyg‘unlikda yashashi uchun izm-irodani ularning qo‘llariga qaytaradi”. Verrettning mijozlari orasida aktrisalar Nina Dobrev va Gvinet Peltrou ham bo‘lgan.
Marta-Luiza esa 50 yoshda, u taxtga da’vogarlik bo‘yicha navbatda to‘rtinchi o‘rinda turadi. Verrett bilan turmushi uning uchun ikkinchisi bo‘ladi: bundan avval u yozuvchi Ari Ben bilan turmush qurib, uch farzandli bo‘lgan. 2002-yilda Marta-Luiza biznes bilan shug‘ullanish uchun “Hazrati oliyalari” unvonidan voz kechgan, ammo malika unvonini saqlab qolgan edi.
Izoh (0)