Kiyev yoki atrofida jangovar harakatlar kechmayotgan boshqa shaharlar aholisini evakuatsiya qilishga hozircha asos yo‘q, dedi Ukraina bosh vaziri Denis Shmigal Vazirlar Mahkamasi yig‘ilishida.
“Evakuatsiya favqulodda chora sifatida oxirgi qadam bo‘lishi mumkin. Har doim B rejangiz bo‘lishi kerak, ammo hozirgi vaziyat bundan yiroq”, — deya tushuntirdi Ukraina hukumati rahbari.
Shmigal energetika xizmati xodimlari energiya tizimining to‘liq ishini tiklash uchun barcha sa’y-harakatlarni amalga oshirayotganiga ishontirdi. Unga ko‘ra, hukumat isitish mavsumi uchun muhim tovarlar — gaz generatorlari, transformatorlar, elektr akkumulyatorlar, suv isitgichlari, isitgichlar va boshqa mahsulotlar uchun QQS va import bojlarini bekor qilish to‘g‘risidagi qarorni tasdiqlaydi.
Avvalroq The New York Times Kiyev hokimiyati agar elektr ta’minotida butkul uzilish yuz bersa, shahar aholisini to‘liq evakuatsiya qilishni rejalashtirayotgani haqida xabar bergandi.
Rossiya 10-oktabrdan buyon Ukraina shaharlari va infratuzilmasiga asosan dronlar bilan zarba bermoqda. Bunday zarbalar Qrim ko‘prigidagi portlashdan keyin boshlangan, uni esa, Rossiya hukumati fikricha, Ukraina maxsus xizmatlari uyushtirgan. 31-oktabr kuni Kiyevda ketma-ket portlashlar sodir bo‘ldi. O‘sha kuni Kiyev, Xarkov va Zaporojye yangi zarbalarga uchradi.
Rossiya zarbalari oqibatida Ukraina energetika infratuzilmasining 40 foizi shikastlandi.
Izoh (0)