8-noyabr kuni Amerika aholisi Kongress Vakillar palatasini to‘liq tarkibda, Senatning uchdan bir qismini, 50 ta shtat gubernatoridan 36 nafarini qayta sayladi. Saylovlar hudud va shahar darajasida o‘tkazildi. Toshkent vaqti bilan 9-noyabr kuni ertalab Alyaska va Gavayida so‘nggi uchastkalar yopildi. Saylov byulletenlarini sanash davom etmoqda. Ushbu saylov natijalari Jo Bayden prezidentligining keyingi ikki yiliga va AQSH siyosatiga, jumladan, Rossiya bilan urushda Ukrainani qo‘llab-quvvatlashiga ta’sir qiladi, deb yozmoqda Meduza.
Respublikachilar yetakchilik qilmoqda. Amerika matbuotining dastlabki ma’lumotlariga ko‘ra, AQSH Kongressi quyi palatasidagi aksariyat o‘rinlarni Respublikachilar partiyasi vakillari egallaydi. The New York Times hisob-kitoblariga ko‘ra, ular 435 o‘rindan 193 tasiga, demokratlar esa 166 o‘ringa egalik qiladi. CNN ma’lumotlari bo‘yicha respublikachilar 195 o‘ringa, raqiblari 176 o‘ringa ega bo‘ladi. Fox News xabariga ko‘ra, respublikachilar Vakillar palatasida kamida 199, demokratlar esa 168 o‘rinni qo‘lga kiritadi.
Senatdagi o‘rinlar uchun ikki partiya o‘rtasida kurash davom etmoqda. Avvaliga OAV har ikki partiyaning yutuqlarini deyarli teng deb baholagan bo‘lsa, keyinroq demokratlar yetakchilik qildi. NBC, The New York Times va CNN ma’lumotlariga ko‘ra, Senatdagi (jami 100 o‘rin) Demokratik partiya 48 kishi, Respublikachilar partiyasi 48 kishidan iborat bo‘ladi. Fox News ma’lumotlari bo‘yicha ham partiyalar teng qarama-qarshilikni davom ettirmoqda – har biriga 48 tadan o‘rin.
Shu bilan birga, CNN ta’kidlashicha, demokratlar ham, respublikachilar ham Senatdagi asosiy o‘rinlarini himoya qilishga muvaffaq bo‘lgan. Demokratlar ikki asosiy hududda — Kolorado (Maykl Bennett) va Nyu-Gempshir (Kris Pappas) g‘olib chiqdi, Arizonada esa, dastlabki ma’lumotlarga ko‘ra, sezilarli farq bilan yetakchilik qilmoqda. O‘sha shtatdagi byulletenlarning yarmini sanab bo‘lgach, Fox News va CNN demokrat Mark Kellini saylovchilarning 56 foizi, respublikachi Bleyk Mastersni esa 41 foizdan ko‘prog‘i qo‘llab-quvvatlaganini xabar qildi.
Pensilvaniyada Senat uchun saylovlarda ovozlarning 90 foizdan ortig‘i sanab chiqilgach, demokrat Jon Fetterman respublikachi Mehmet O‘zdan 2,5 foizga ortda qoldi. Yana bir muhim shtat, Jorjiyada amaldagi demokrat senator Rafael Uornok respublikachi raqibidan 1 foizdan kamroq ovoz bilan oldinda. O‘z navbatida, Florida (Mark Rubio) va Ogayo (Jey Di Vens) shtatlarida respublikachilar saylandi.
Gubernatorlik saylovlarida, CNNning dastlabki ma’lumotlariga ko‘ra, respublikachilar 16 shtatda, demokratlar 11 shtatda yetakchilik qilmoqda. Asosiy g‘alabalardan biri Respublikachilar partiyasi vakili Ron Desantisning Florida shtatida qayta saylangani bo‘ldi. Telekanal ma’lumotlariga ko‘ra, u odatda demokratlarga ovoz beradigan lotin-amerikan aholining qo‘llab-quvvatlovini olishga muvaffaq bo‘lgan.
Aksariyat saylovchilar Jo Baydenning prezidentlik faoliyatidan norozi edi. So‘rovnomalar natijalariga ko‘ra, saylovchilarning 53 foizi amaldagi prezidentning 2024-yilda ikkinchi muddatga saylanishini istamaydi. So‘rovda qatnashganlarning yarmidan sal ko‘pi Bayden siyosati mamlakatga zarar yetkazayotganini aytgan, uchdan bir qismi esa bunga qarama-qarshi fikrda.
Shuningdek, oraliq saylovlarda saylovchilarning ovoziga ta’sir ko‘rsatgan eng muhim omil inflyatsiya bo‘ldi. Ikkinchi o‘rinda — abortni taqiqlash.
Izoh (0)