“Xitoy xavfsizligi masalasi noaniq qolmoqda”. Si Szinpin Xitoy armiyasini urushga tayyorlash kuchaytirilishini e’lon qildi

Xitoy xavfsizligi masalasi tobora beqaror va noaniq bo‘lib bormoqda, dedi mamlakat rahbari Si Szinpin. Uning aytishicha, Xitoy o‘zining harbiy shayligi va har qanday urushga tayyorgarligini kuchaytiradi.

“Xitoy harbiy shaylik va har qanday urushga tayyorgarlikni har tomonlama kuchaytiradi”, — deya Si Szinpinning so‘zlarini keltirdi Reuters.

U shuningdek, Xitoy Xalq ozodlik armiyasi qo‘mondonligi qo‘shinlar orasida innovatsiyalarni amalga oshirishi va Xitoy kuchlarining ziddiyatlarga samarali ro‘para turishi uchun ishonchli mexanizmlarni shakllantirishi kerakligini ta’kidladi.

“Dunyoda davrlar o‘zgarishi tobora jadal kechmoqda. Shu munosabat bilan Xitoy xavfsizligiga ta’sir etuvchi noaniqlik va beqarorlashtiruvchi omillar kuchaymoqda. Biz vatanimizning milliy suvereniteti, xavfsizligi va taraqqiyot manfaatlarini qat’iy himoya qilishimiz zarur”, — deb qo‘shimcha qildi  Si Szinpin.

Oktabr oyi boshida Tayvan o‘zining havo hujumidan mudofaa zonasiga Xitoy harbiy-havo kuchlari keng ko‘lamda kirgani haqida xabar bergandi. Shu fonda Si Szinpin Tayvan bilan tinch yo‘l orqali “birlashish”ga va’da bergan.

O‘z navbatida AQSH prezidenti Jo Bayden Pekin agressiyasi yuz bergan taqdirda, Tayvanga yordam berishni va’da qilgan va orolda harbiy zahira tayyorlashni boshlagan.