Yevrokomissiya rahbarining birinchi o‘rinbosari Valdis Dombrovskis Yevropa Ittifoqining joriy yilda Ukrainaga makromoliyaviy barqarorlashtirish dasturidan may oyida va’da qilingan 9 milliard yevrolik yordam paketining uchdan bir qismini ajrata olmasligini ma’lum qildi, deb yozadi “RBK”.
“Biz va’da qilingan miqdorni (9 milliard yevro) atroflicha muhokama qildik. Afsuski, bu yil oldinga siljish bo‘yicha qaror qabul qilishning iloji bo‘lmadi. Yil oxirigacha Kiyevga berilishi ko‘zda tutilgan 3 milliard yevroni ajratishning iloji yo‘q”, — dedi Dombrovskis.
Kompensatsiya sifatida Dombrovskis kelasi yil boshida Ukrainaga 2023-yil uchun va’da qilingan 18 milliard yevrodan katta miqdorda mablag‘ ajratish zarurligini e’lon qildi.
“Biz 9 milliard yevroni to‘laligicha o‘tkazib beramiz. Bu to‘lov Ukraina ehtiyojlarini hisobga olgan holda yanvar oyidayoq amalga oshirilishi kerak”, — dedi u. Biroq bu may oyida e’lon qilingani emas, balki keyingi yordam dasturiga kiritilgan.
9 milliard yevrolik yordam paketidan 1 milliard yevro avgustda, yana 2 milliard yevro oktabrda to‘langan va yil oxirigacha Bryussel Kiyevga yana 3 milliard yevroga yaqin makromoliyaviy yordam o‘tkazishni rejalashtirgan edi.
Avvalroq Yevropa Ittifoqining Ukrainaga 18 milliard yevro miqdoridagi moliyaviy yordam bermoqchi ekanligi haqida xabar berilgan edi.
Izoh (0)