Украина президенти Владимир Зеленскийнинг Россия билан музокаралар учун шартлари ҳақидаги баёноти АҚШнинг «енгилгина турткиси» билан боғлиқ бўлган, деб ёзади Politico ўз манбаларига таяниб.
Шу билан бирга, америкалик амалдорлар украиналик ҳамкасблари билан суҳбатларда Украинанинг ўз позициясини ўзгартиришини бевосита талаб қилмаган, бироқ улар Киев жанговар ҳаракатларни тинч йўл билан ва оқилона тугатишга тайёрлигини намойиш этиши кераклигини таъкидлаган.
«Бу улар ҳозироқ музокараларни бошлаши керак дегани эмас. Биз ҳатто, Россиянинг ҳаракатларидан келиб чиқиб, ҳозир айни мавриди эмас, деган фикрдамиз», — деди АҚШ президенти маъмуриятининг юқори мансабли ходими.
Гап Зеленский 8 ноябрь куни эълон қилган баёнот ҳақида бормоқда. У Россия билан мулоқот бошлаш учун Украинанинг шартларини маълум қилганди. Улар эса Россияга қўшиб олинган ҳудудлар қайтарилган ҳолда Украина ҳудудий яхлитлигининг қайта тикланиши, БМТга ҳурмат, барча зарарларнинг қопланиши, ҳар битта ҳарбий жиноятчининг жазоланиши ва бу бошқа ҳеч қачон такрорланмаслигининг кафолатланишидан иборат эди.
Аввалроқ АҚШ ва НАТО ҳукумати Украина армияси Россия қўшинлари томонидан эгалланган Херсонни озод этганидан кейин Россия билан музокараларни бошлаши мумкин, деган фикрда эканлиги, АҚШ бундай хабарни Евроиттифоққа узатгани ва энди бу фикрни Украина ҳукуматига уқтираётгани хабар берилганди.
Ноябрь бошроғида Американинг The Washington Post газетаси АҚШ президенти маъмурияти Украина ҳукуматига мурожаат қилиб, Украинани қўллаб-қувватлаётган мамлакатлар аҳолисини хавотирга солмаслик учун Киев Москва билан музокараларга тайёрлигини оммага намойиш қилишни сўрагани ҳақида хабар берганди.
Украина Россия билан музокаралардан расман воз кечганди
30 сентябрь куни Кремлда Донецк ва Луганск халқ республикалари ҳамда Украинанинг Херсон ва Запорожье вилоятлари босиб олинган қисмларининг «Россия таркибига кириши» ҳақида шартномалар имзоланди. Ўша куниёқ Украина ҳукумати НАТОга қўшилиш учун ариза берди. Зеленский ўшанда Россия билан мулоқотга тайёрлигини айтган, лекин «бошқа президент билан» деган эди.4 октябрь куни эса Украина расман Путин билан ҳар қандай музокаралардан бош тортди.
Изоҳ (0)