Rossiya hukumati dronlar partiyasi evaziga Eronga naqd valyuta va Ukrainada qo‘lga kiritilgan G‘arb qurol-yarog‘lari namunalarini yuborgan. Bu haqda Sky News xavfsizlik xizmatlaridagi manbasiga tayanib xabar bermoqda.
Britaniya telekanali suhbatdoshi bergan ma’lumotlarga ko‘ra, 20-avgust kuni erta tongda Tehron aeroportiga Rossiya samolyoti uchib kelgan, u o‘zi bilan 140 million yevro naqd pul, shuningdek, Britaniyaning NLAW tankka qarshi raketasi, Amerikaning Javelin tankka qarshi raketa majmuasi va Stinger zenit-raketa majmuasidan iborat qurol-yarog‘larni olib kelgan.
Qo‘lga kiritilgan qurol-yarog‘ Eronning Islom inqilobi posbonlari korpusiga bo‘lg‘usi urushlarda foydalanish uchun G‘arb texnologiyalarini o‘rganish va ulardan nusxa olish imkonini beradi, deb hisoblaydi Sky News manbasi.
Buning evaziga Moskva Erondan 160 dan ortiq uchuvchisiz uchar qurilmalar, shu jumladan 100 ta Shahed-136 kamikadze-dronlarini olgan.
Keyingi bir necha kun davomida Moskva va Tehron 200 million yevrolik dronlarni yetkazib berish haqida yana bir oldi-sotdi bitimini kelishib olgan, deya da’vo qilmoqda kanal manbasi.
Eron va Rossiya bir necha oylar davomida Tehron Moskvaga jangovar uchar qurilmalar yetkazib berilayotganini, ular esa keyin Ukrainada qo‘llanilayotganini rad etib keldi. 5-noyabr kuni Eron tashqi ishlar vaziri birinchi marta Rossiyaga dronlar yuborilayotganini tan oldi, biroq bu Ukrainaga hujumdan avval yuz bergani va gap “kam miqdordagi” dronlar haqida borganini ma’lum qildi.
Izoh (0)