Toshkent shahri Chilonzor tumanida tadbirkorning 35 ming dollarini qo‘lga kiritgan shaxs aniqlandi. Bu haqda Iqtisodiy jinoyatlarga qarshi kurashish departamenti xabar berdi.
Bosh prokuratura huzuridagi departamentning Chilonzor tumani bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Aniqlanishicha, fuqaro A.Ch. “F.B.” MCHJ rahbari A.K.ning ishonchiga kirib, unga yuqori lavozimda ishlovchi tanishlari yordamida “Do‘mbirobod” MFY hududida qurilayotgan ko‘p qavatli savdo kompleksi oldida joylashgan umumiy maydoni 428,4 metr kvadrat bo‘lgan avtoturargohda ushbu MCHJ tomonidan zamonaviy ko‘rinishdagi savdo shoxobchalarini qurish uchun hujjatlarni rasmiylashtirib berishini aytgan.
Shundan so‘ng aldov yo‘li bilan tadbirkorning 35 ming dollarini qo‘lga kiritgan. A.Ch. o‘z ixtiyori bilan 35 ming dollarni qaytargani protsessual tartibda rasmiylashtirilgan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)