Тошкент шаҳри Чилонзор туманида тадбиркорнинг 35 минг долларини қўлга киритган шахс аниқланди. Бу ҳақда Иқтисодий жиноятларга қарши курашиш департаменти хабар берди.
Бош прокуратура ҳузуридаги департаментнинг Чилонзор тумани бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Аниқланишича, фуқаро А.Ч. «Ф.Б.» МЧЖ раҳбари А.К.нинг ишончига кириб, унга юқори лавозимда ишловчи танишлари ёрдамида «Дўмбиробод» МФЙ ҳудудида қурилаётган кўп қаватли савдо комплекси олдида жойлашган умумий майдони 428,4 метр квадрат бўлган автотураргоҳда ушбу МЧЖ томонидан замонавий кўринишдаги савдо шохобчаларини қуриш учун ҳужжатларни расмийлаштириб беришини айтган.
Шундан сўнг алдов йўли билан тадбиркорнинг 35 минг долларини қўлга киритган. А.Ч. ўз ихтиёри билан 35 минг долларни қайтаргани процессуал тартибда расмийлаштирилган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)