Prezident topshirig‘i: Qrim va Sevastopol hududlaridagi talabalar ham o‘qishini ko‘chirishi mumkin

Ijtimoiy tarmoqlarda Vernadskiy nomidagi Qrim federal universitetining uchinchi kursida tahsil olayotgan o‘zbekistonlik bir guruh talabalarning Shavkat Mirziyoyevga yo‘llagan videomurojaati tarqalgandi. Ular o‘qishini O‘zbekistonga ko‘chirishda amaliy yordam so‘ragan. Oliy va o‘rta maxsus ta’lim vazirligining ma’lum qilishicha, Qrim va Sevastopol hududlaridagi talabalar ham istisno tariqasida o‘qishini ko‘chirishi mumkin.

Qrim federal universiteti tibbiyot akademiyasining o‘zbek talabalari ijtimoiy tarmoqlar orqali Shavkat Mirziyoyevga murojaat qilib, “hozirda Qrim hududi urush tufayli xavfli hududlar sirasiga kirayotgani bois” ularning ham o‘qishini O‘zbekiston OTMlariga ko‘chirishda amaliy yordam so‘ragan.

Davlat rahbari topshirig‘iga asosan, davlat oliy ta’lim muassasalariga o‘qishga qabul qilish jarayonlarini muvofiqlashtirish bo‘yicha Davlat komissiyasining tegishli bayoni bilan Qrim va Sevastopol hududlaridagi OTMda tahsil olayotgan O‘zbekiston fuqarolarining ham o‘qishini O‘zbekistondagi davlat OTMga istisno tariqasida ko‘chirishga ruxsat berildi.

Mavzuga doir:

• “Bu yerda vaziyat notinch”. Rossiyaning Kursk viloyatida o‘qiyotgan 100 dan ortiq talaba Shavkat Mirziyoyevga murojaat yo‘lladi (video)
• Rossiyada qo‘shma ta’lim bo‘yicha o‘qishga qabul qilinmay, Shavkat Mirziyoyevga murojaat yo‘llagan o‘zbekistonlik talabalarga yordam berildi