Toshkentda erkak 6 yoshli qizga tegajog‘lik qilganlikda ayblanmoqda

Toshkentda erkak 6 yoshli qizchaga tegajog‘lik qilgani haqida xabarlar tarqaldi. Poytaxt sudlari matbuot xizmati ushbu holat yuzasidan qo‘zg‘atilgan jinoyat ishi yopiq sud majlisida ko‘rilayotganini ma’lum qildi.

Qayd etilishicha, 11-oktabr kuni jinoyat ishlari bo‘yicha Yunusobod tuman sudiga Jinoyat kodeksining 119-moddasi (jinsiy ehtiyojni zo‘rlik ishlatib g‘ayritabiiy usulda qondirish) 4-qismi va 129-moddasi (16 yoshga to‘lmagan shaxsga nisbatan uyatsiz-buzuq harakatlar qilish) 1-qismi bilan R. Sh.ga nisbatan bo‘lgan jinoyat ishi kelib tushgan.

Sud muhokamasi 17-oktabrdagi tayinlash ajrimi bilan 26-oktabr kuniga yopiq sud majlisida ko‘rish uchun tayinlanib, yopiq sud majlisida ishni ko‘rish boshlangan.

Xabarda Jinoyat-protsessual kodeksining 23-moddasiga binoan “gumon qilinuvchi, ayblanuvchi yoki sudlanuvchi uning jinoyat sodir etishda aybdorligi qonunda nazarda tutilgan tartibda isbotlangunga va qonuniy kuchga kirgan sud hukmi bilan aniqlangunga qadar aybsiz hisoblanadi”, shuningdek, Jinoyat-protsessual kodeksining 19-moddasida “...sudning qonuniy kuchga kirgan qarorlari jinoyat protsessi ishtirokchilarining roziligi bilan yoki shaxsini ko‘rsatmagan tarzda sudning rasmiy veb-saytida e’lon qilinishi mumkin, bundan yopiq sud majlislarida ko‘rilgan ishlar bo‘yicha sud qarorlari mustasno”, deb belgilab qo‘yilgani ta’kidlangan.

Shuningdek, surishtiruv yoki dastlabki tergov ma’lumotlarini surishtiruvchi, tergovchi yoki prokurorning ruxsatisiz oshkor qilish Jinoyat kodeksining 239-moddasi (surishtiruv yoki dastlabki tergov ma’lumotlarini oshkor qilish) da ko‘rsatilgan jinoiy javobgarlikka tortilishga sabab bo‘lishi eslatilgan.

“Ijtimoiy tarmoqlarda muhokamalarga sabab bo‘layotgan R. Sh.ga nisbatan bo‘lgan jinoyat ishi yopiq sud majlisida ko‘rilayotganligi, sud hali o‘zining yakuniy qarorini e’lon qilmasdan turib, tergov harakatlari jarayoni videotasvirlari oshkor qilinganligi, qonunda belgilangan tartibda javobgarlikka tortilishiga sabab bo‘lishi va sudning ishni xolisona ko‘rib chiqishiga to‘sqinlik qilish uchun o‘tkazilayotgan bosim sifatida baholanishi ma’lum qilinadi”, — deyiladi xabarda.