Kardiologiya markazi Germaniyaning nufuzli Sharite klinikasi bilan hamkorlikni yo‘lga qo‘ydi. Bu haqda Sog‘liqni saqlash vazirligi matbuot xizmati xabar bermoqda.
Qayd etilishicha, Respublika ixtisoslashtirilgan kardiologiya ilmiy-amaliy tibbiyot markazida kadrlarning xorijlik hamkasblari bilan hamkorligini mustahkamlashga alohida e’tibor qaratilyapti.
Muassasamiz dunyoning eng nufuzli klinikalari bilan yaqin aloqalarni yo‘lga qo‘ygan. Xususan, joriy yil yosh shifokorlarimiz Rossiya, Janubiy Koreya, Shveysariya, Polsha kabi xorijiy davlatlarning yetakchi kardiologiya shifoxonalarida malaka oshirdi. Qolaversa, Almazov nomidagi Sankt-Peterburg kardiologiya markazi bilan tuzilgan shartnomaga asosan, bir guruh mutaxassislar yurak-qon tomir kasalliklarini zamonaviy, yuqori texnologik usulda davolash bo‘yicha tajriba orttirib qaytdi.Germaniyaning Sharite klinikasi dunyodagi nufuzli shifoxonalardan biri bo‘lib, o‘z mamlakatining eng yaxshi tibbiyot muassasalari reytingida 1-o‘rinni band etgan. Shuningdek, u amaliyotchi shifokorlar va ilmiy xodimlarni o‘qitish, zamonaviy diagnostika va o‘ta murakkab klinik holatlarni davolashda boy tajribaga ega. E’tiborli jihati, Germaniyadagi tibbiyot va fiziologiya bo‘yicha Nobel mukofotini olgan olimlarning aksariyati aynan shu klinikada tahsil olgan va faoliyat yuritgan.Bundan tashqari, shu yil Shveysariyaning Syurix universiteti klinikasi professorlari — Ahmed Ouda va perfuziolog Koyen Vantilberg markazimizga tashrif buyurib, mahalliy yosh kardioxirurglar bilan birga yuqori texnologiyali jarrohlik operatsiyalarini amalga oshirdi. Tashrif davomida muassasamizga “EuroAsia Heart” fondi tomonidan qiymati 1 million yevrolik uskunalar beg‘araz yordam sifatida topshirildi, — deydi markaz direktori Xurshid Fozilov.
Respublika kardiologiya markazi mazkur nufuzli klinika bilan mutaxassislar malakasini oshirish va mahorat darslarini tashkil etish bo‘yicha o‘zaro kelishuvga erishdi. Bu esa O‘zbekistonda kardiologiya sohasini yangi bosqichga olib chiqishda muhim ahamiyatga ega bo‘ladi.
Bundan tashqari, 2022-yil Ispaniyaning Barselona shahrida bo‘lib o‘tgan Yevropa kardiologlar assotsiatsiyasining navbatdagi kongressida muassasaning 14 nafar mutaxassisi O‘zbekistonda mazkur sohada erishilgan yutuqlari haqidagi ilmiy ma’ruzalari bilan ishtirok etdi.
Ayni paytda Respublika ixtisoslashtirilgan kardiologiya ilmiy-amaliy tibbiyot markazida bemorlarga to‘g‘ri tashxis qo‘yish, davolash, bir so‘z bilan aytganda, ularga sifatli tibbiy xizmat ko‘rsatish uchun 115 nafar yetuk va malakali shifokor, xususan, 1 nafar akademik, 5 nafar nafar professor, 18 nafar tibbiyot fanlari doktori, 30 nafar tibbiyot fanlari nomzodi va 39 nafar oliy toifali shifokor samarali mehnat qilmoqda.
Izoh (0)