Toshkent shahri Bektemir tumanida kuchli ta’sir qiluvchi dori vositalari muomalaga kiritilishining oldi olindi, deb xabar beradi Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departamentning Bektemir tuman bo‘limi tomonidan IIB xodimlari bilan hamkorlikda tergovga qadar tekshiruv o‘tkazilgan. Unda “Iqbol” MFY hududida fuqaro S.M. o‘z yashash xonadonida tarkibida kuchli ta’sir qiluvchi moddalar mavjud bo‘lgan jami 1 538 dona “Regapen” nomli dori vositalarini o‘tkazish maqsadida saqlab kelayotgani aniqlanib, ashyoviy dalil sifatida olingan.
Shuningdek, departamentning Bektemir tuman bo‘limi tomonidan IIB xodimlari bilan hamkorlikda o‘tkazilgan yana bir tergovga qadar tekshiruvda “Majnuntol” MFY hududidagi “Sharq” YPX maskanida fuqaro B.N.boshqaruvidagi Lacetti avtotransport vositasi ko‘zdan kechirilgan. Natijada 50 dona “Tropikamid” nomli kuchli ta’sir qiluvchi dori vositalarini Toshkent shahrida o‘tkazish maqsadida olib kelayotgani aniqlanib, ashyoviy dalil sifatida olingan.
Mazkur holatlar yuzasidan Jinoyat kodeksining 251-1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)