Тошкентда эркак 6 ёшли қизчага тегажоғлик қилгани ҳақида хабарлар тарқалди. Пойтахт судлари матбуот хизмати ушбу ҳолат юзасидан қўзғатилган жиноят иши ёпиқ суд мажлисида кўрилаётганини маълум қилди.
Қайд этилишича, 11 октябрь куни жиноят ишлари бўйича Юнусобод туман судига Жиноят кодексининг 119-моддаси (жинсий эҳтиёжни зўрлик ишлатиб ғайритабиий усулда қондириш) 4-қисми ва 129-моддаси (16 ёшга тўлмаган шахсга нисбатан уятсиз-бузуқ ҳаракатлар қилиш) 1-қисми билан Р. Ш.га нисбатан бўлган жиноят иши келиб тушган.
Суд муҳокамаси 17 октябрдаги тайинлаш ажрими билан 26 октябрь кунига ёпиқ суд мажлисида кўриш учун тайинланиб, ёпиқ суд мажлисида ишни кўриш бошланган.
Хабарда Жиноят-процессуал кодексининг 23-моддасига биноан «гумон қилинувчи, айбланувчи ёки судланувчи унинг жиноят содир этишда айбдорлиги қонунда назарда тутилган тартибда исботлангунга ва қонуний кучга кирган суд ҳукми билан аниқлангунга қадар айбсиз ҳисобланади», шунингдек, Жиноят-процессуал кодексининг 19-моддасида «...суднинг қонуний кучга кирган қарорлари жиноят процесси иштирокчиларининг розилиги билан ёки шахсини кўрсатмаган тарзда суднинг расмий веб-сайтида эълон қилиниши мумкин, бундан ёпиқ суд мажлисларида кўрилган ишлар бўйича суд қарорлари мустасно», деб белгилаб қўйилгани таъкидланган.
Шунингдек, суриштирув ёки дастлабки тергов маълумотларини суриштирувчи, терговчи ёки прокурорнинг рухсатисиз ошкор қилиш Жиноят кодексининг 239-моддаси (суриштирув ёки дастлабки тергов маълумотларини ошкор қилиш) да кўрсатилган жиноий жавобгарликка тортилишга сабаб бўлиши эслатилган.
«Ижтимоий тармоқларда муҳокамаларга сабаб бўлаётган Р. Ш.га нисбатан бўлган жиноят иши ёпиқ суд мажлисида кўрилаётганлиги, суд ҳали ўзининг якуний қарорини эълон қилмасдан туриб, тергов ҳаракатлари жараёни видеотасвирлари ошкор қилинганлиги, қонунда белгиланган тартибда жавобгарликка тортилишига сабаб бўлиши ва суднинг ишни холисона кўриб чиқишига тўсқинлик қилиш учун ўтказилаётган босим сифатида баҳоланиши маълум қилинади», — дейилади хабарда.
Изоҳ (0)