Maktablarga qarashli 19 ta bino-inshoot noqonuniy egallab olingan. Bu haqda Xalq ta’limi vazirligi axborot xizmati rahbari Laylo Rustamova “Daryo”ga ma’lum qildi.
Laylo Rustamovaning aytishicha, 198 ta holatda hududlardagi maktablarning 69 ta yer-maydoni hamda 19 ta bino-inshooti 2018—2022-yillar davomida xalq ta’limi vazirining roziligi olinmasdan noqonuniy ravishda egallab olingan.
“Xususan, 96 tasi hokim qaroriga asosan hokimlik zaxirasiga olingan, 55 tasi hokim qaroriga asosan tadbirkorlik subyektlariga berilgan. Shuningdek, 13 tasida fuqarolar tomonidan va 3 tasida hokimlik tomonidan uy-joy qurilgan, 19 tasida mahalla fuqarolar idorasi qurilgan, 12 tasi turli davlat tashkilotlariga berilgan”, — dedi Laylo Rustamova.
Bu holatlar eng ko‘p qayd etilgan hududlar:
- Andijon viloyatida 61 ta obyekt, jami 24,8 gektar maydon,
- Qashqadaryo viloyatida 26 ta obyekt, jami 7,75 gektar maydon,
- Namangan viloyatida 20 ta obyekt, jami 5,5 gektar yer maydonlari noqonuniy ravishda foydalanilgan.
Ma’lumot uchun, Prezident Shavkat Mirziyoyevning “Yer uchastkalaridan foydalanishda davlat nazorati samaradorligini oshirish chora-tadbirlari to‘g‘risida”gi qarorini samarali tashkil qilishga mas’ul va shaxsiy javobgar etib Bosh prokuror, ichki ishlar vaziri, qishloq xo‘jaligi vaziri hamda Davlat soliq qo‘mitasi raisi belgilangan.
Avvalroq Prezident administratsiyasi rahbari Sardor Umurzoqov o‘zlashtirilgan maktab yerlarini o‘rganib chiqish yuzasidan topshiriq bergan edi.
Mavzuga doir: “Hokim o‘zboshimchalik qilgan”. Andijonda maktab stadioni tadbirkorga sotib yuborilgani aytilmoqda
Izoh (0)