Ўзбекистон адлия вазири Русланбек Давлетов ва ташқи ишлар вазири ўринбосари Фурқат Сидиқов бошчилигидаги делегациянинг АҚШга давом этаётган ташрифи доирасида Америка расмий доиралари, жумладан, Адлия вазирлиги ва Давлат департаментида учрашувлар ўтказилди, деб хабар қилмоқда «Дунё» ахборот агентлиги.
Қайд этилишича, АҚШ адлия вазири ўринбосари Брюс Шварс билан учрашув доирасида ходимлар малакасини ошириш соҳасида ҳамкорликни йўлга қўйиш истиқболлари, шунингдек, миллий қонунчиликни такомиллаштириш соҳасида ўзаро мулоқотни кенгайтириш юзасидан фикр алмашилган.
Ўзбекистоннинг АҚШдаги элчихонаси хабарига кўра, суҳбат чоғида Америка вакиллари ҳуқуқ-тартибот идоралари ўртасидаги ҳамкорликни кенгайтириш, биринчи навбатда, интеллектуал мулкни ҳимоя қилиш, киберҳужумларга қарши курашиш, криминалистика ва суд-тиббиёт экспертизаси соҳаларида ўзбекистонлик мутахассислар салоҳиятини мустаҳкамлашдан манфаатдорлик билдирган.
Брюс Шварс АҚШ Адлия вазирлигининг АҚШ ва Ўзбекистон ўртасида жиноий ишлар бўйича ҳуқуқий ёрдам тўғрисидаги битимни имзолаш масаласини илгари суришдан манфаатдор эканини тасдиқлаган.
Ташриф доирасида диний эркинликни таъминлаш соҳасида мулоқотни кучайтириш мақсадида АҚШнинг халқаро диний эркинлик бўйича махсус топшириқлар бўйича элчиси Рашад Ҳусайн билан ҳам учрашув бўлиб ўтган.
Рашад Ҳусайн Америка Қўшма Штатлари Ўзбекистоннинг диний эркинлик соҳасидаги сезиларли ютуқларини олқишлашини таъкидлаган. Хорижий давлатлар ва халқаро институтлар билан ўрнатилган очиқ мулоқот ва ҳамкорлик даражаси Ўзбекистон раҳбариятининг диний эътиқод эркинлигини таъминлаш борасидаги қатъийлигидан далолат беришини қайд этган. Шунингдек, у АҚШ диний эркинлик соҳасидаги қонунчиликни такомиллаштиришда Ўзбекистонни қўллаб-қувватлашини урғулаган.
Ўзбекистон делегациясининг АҚШга ташрифи давом этмоқда.
Изоҳ (0)