Kiyev hokimiyati elektr ta’minotida butkul uzilish yuz berib, energetika infratuzilmasiga navbatdagi zarar asosiy xizmatlarni ko‘rsatish imkoniyatini xavf ostiga qo‘ygan taqdirda, shaharda qolgan 3 millionga yaqin aholini evakuatsiya qilishni rejalashtirmoqda. Bu haqda The New York Times xabar berdi.
Ukraina poytaxti rasmiylariga ular favqulodda vaziyat haqida 12 soat ichida ogohlantirilishi aytilgan. “Agar shunday vaziyat yuzaga kelsa, biz odamlarni xabardor qilishni boshlaymiz va ulardan shaharni tark etishni so‘raymiz”, — dedi nashrga shahar xavfsizlik boshqarmasi direktori Roman Tkachuk.
“Biz elektr ta’minoti tizimidan to‘liq ayrilishimiz mumkin, bu suv ta’minoti va kanalizatsiya yo‘qolishini anglatadi. Kiyev hukumati energiya tizimini himoya qilish uchun hamma chorani ishga solmoqda”, — dedi u.
Kiyev meri Vitaliy Klichkoning aytishicha, urush boshlanishidan oldin Kiyevda 3,5 million kishi yashagan, yana 1 million kishi ishlash uchun kelgan. Keyin shahar aholisi 1 million kishiga kamaydi, may oyiga kelib aholi 2,2 million kishini tashkil qildi.
Rossiya 10-oktabrdan buyon Ukraina shaharlari va infratuzilmasiga asosan dronlar bilan zarba bermoqda. Bunday zarbalar Qrim ko‘prigidagi portlashdan keyin boshlangan, uni esa, Rossiya hukumati fikricha, Ukraina maxsus xizmatlari uyushtirgan. 31-oktabr kuni Kiyevda ketma-ket portlashlar sodir bo‘ldi. O‘sha kuni Kiyev, Xarkov va Zaporojye yangi zarbalarga uchradi.
Rossiya zarbalari oqibatida Ukraina energetika infratuzilmasining 40 foizi shikastlandi.
Izoh (0)