Киев ҳокимияти электр таъминотида буткул узилиш юз бериб, энергетика инфратузилмасига навбатдаги зарар асосий хизматларни кўрсатиш имкониятини хавф остига қўйган тақдирда, шаҳарда қолган 3 миллионга яқин аҳолини эвакуация қилишни режалаштирмоқда. Бу ҳақда The New York Times хабар берди.
Украина пойтахти расмийларига улар фавқулодда вазият ҳақида 12 соат ичида огоҳлантирилиши айтилган. «Агар шундай вазият юзага келса, биз одамларни хабардор қилишни бошлаймиз ва улардан шаҳарни тарк этишни сўраймиз», — деди нашрга шаҳар хавфсизлик бошқармаси директори Роман Ткачук.
«Биз электр таъминоти тизимидан тўлиқ айрилишимиз мумкин, бу сув таъминоти ва канализация йўқолишини англатади. Киев ҳукумати энергия тизимини ҳимоя қилиш учун ҳамма чорани ишга солмоқда», — деди у.
Киев мери Виталий Кличконинг айтишича, уруш бошланишидан олдин Киевда 3,5 миллион киши яшаган, яна 1 миллион киши ишлаш учун келган. Кейин шаҳар аҳолиси 1 миллион кишига камайди, май ойига келиб аҳоли 2,2 миллион кишини ташкил қилди.
Россия 10 октябрдан буён Украина шаҳарлари ва инфратузилмасига асосан дронлар билан зарба бермоқда. Бундай зарбалар Қрим кўпригидаги портлашдан кейин бошланган, уни эса, Россия ҳукумати фикрича, Украина махсус хизматлари уюштирган. 31 октябрь куни Киевда кетма-кет портлашлар содир бўлди. Ўша куни Киев, Харьков ва Запорожье янги зарбаларга учради.
Россия зарбалари оқибатида Украина энергетика инфратузилмасининг 40 фоизи шикастланди.
Изоҳ (0)