AQSH Ukrainadan Rossiya bilan muzokaralarga ochiqlik ko‘rsatishni so‘ramoqda — WP

AQSH prezidenti Jo Bayden ma’muriyati Ukraina rahbariyatini Rossiya bilan muzokaraga ochiqlik ko‘rsatishga chaqirmoqda, deb xabar berdi The Washington Post (WP) manbalari. Gazetaning yozishicha, Vashington Kiyevning Rossiyani Vladimir Putin boshqarayotgan paytda Moskva bilan muzokara olib bormaslik tamoyilidan voz kechishini istaydi.

Nashr suhbatdoshlarining fikricha, bu Ukrainani muzokaralarga undash istagini anglatmaydi, aksincha, “Kiyev hukumatining boshqa davlatlar tomonidan qo‘llab-quvvatlanishini ta’minlashga urinish”dir.

AQSH rasmiylari Ukraina prezidenti Vladimir Zelenskiyning muzokaralardan bosh tortgani Yevropa, Afrika va Lotin Amerikasidagi ayrim mamlakatlarda mojaroning iqtisodiyotga ta’siridan xavotir uyg‘otganini tan oldi.

“Ukraina charchog‘i ba’zi hamkorlarimiz uchun haqiqiy muammodir”, — dedi gazeta suhbatdoshlaridan biri.

Gazetaning AQSHdagi manbalariga ko‘ra, Ukraina prezidenti Vladimir Zelenskiy muzokaralarni qo‘llab-quvvatlashi va taxminan bahorga kelib, yon berishi mumkin. Shu bilan birga, Kiyev “diplomatiya oynasi” ochilishi kutilayotgan qish boshlanishidan oldin “iloji boricha ko‘proq harbiy muvaffaqiyatlar o‘rnatishga” urinmoqda.

WP ta’kidlaganidek, Vashington zarur bo‘lganda yordamni davom ettirishga tayyorligini ochiq e’lon qilmoqda. Biroq oraliq saylovlardan so‘ng Kongress nazoratini o‘z qo‘liga olishi mumkin bo‘lgan Respublikachilar partiyasidagi so‘rovnomalar shuni ko‘rsatadiki, partiyaning Kiyevga xuddi shu darajadagi yordamni davom ettirishni xohlaydigan a’zolari kam.

Rossiya—Ukraina muzokaralari may oyida to‘xtatilgan edi. Delegatsiyalarning so‘nggi yuzma-yuz uchrashuvi 29-mart kuni Istanbulda bo‘lib o‘tgan. Rossiya Donetsk va Lugansk xalq respublikalari, Zaporojye va Xerson viloyatlarini anneksiya qilganidan so‘ng, Ukraina prezidenti Vladimir Zelenskiy Vladimir Putin Rossiya prezidenti lavozimidan ketmaguncha, muzokaralar o‘tkazish imkoniyatidan bosh tortdi. Oktabr oyi oxirida Putin Kiyev bilan ehtimoliy muloqot haqida fikr bildirar ekan, “Moskva muloqot davom ettirilishini kutmoqda” dedi.