Samarqandda bo‘lib o‘tayotgan iqtisodiy forum doirasida xorijlik jurnalist, Bloomberg TV muxbiri Rayan Chilkot O‘zbekistonga investitsiya kiritmoqchi bo‘layotganlarga qanday kafolatlar borligi, nimasi bilan mamlakat xorijlik investorlarni o‘ziga jalb qilishi mumkinligi haqida savol bergan.
“Masalan, men potensial investorman. O‘zbekistondagi iqtisodiy forumga keldim. Bu yerda hamma narsa ajoyib, ayniqsa, palov. Lekin men hali investitsiya kiritish bo‘yicha bir aniq qarorga kelmadim. Hali ham ikkilanib turibman. Siz bu mamlakatda qanday ishlar olib borilayotgani, kelgusi besh yillikda nimalar ro‘y berishi mumkinligi haqida investorga nima deya olasiz? Aynan hozir O‘zbekistonga investitsiya kiritish vaqti ekaniga qanday kafolatlar bera olasiz?”, — degan jurnalist. Shu bilan birga hazil aralash “Bunday savoldan keyin mening O‘zbekistondagi forumga oxirgi marta kelishim bo‘lsa kerak”, — deb qo‘shimcha qildi.
Mazkur savolga O‘zbekiston bosh vazirining o‘rinbosari, iqtisodiy taraqqiyot va kambag‘allikni qisqartirish vaziri Jamshid Qo‘chqorovning javob berishga urinib ko‘rdi.
“Avvalambor, kelgusi besh yil davomida O‘zbekiston ko‘proq ekologik mamlakatga aylanishiga umid qilib qolamiz. Biz barcha elektrostansiyalarni almashtiramiz.
Ikkinchidan, davlatga tegishli faqat bitta bank qoladi. Balki ba’zi ulushlar saqlanib qolar”, — dedi Qo‘chqorov. Keyin esa gapni hazilga burib yubordi.
Rayan: “Esingizda bo‘lsa, o‘tgan yilgi forumda investorlarga kelgusi yil uchun qanday kafolatlar bera olasiz, deb savol bergandim. Mana, bir yildan so‘ng men yana shu yerdaman”.
Jamshid Qo‘chqorov: “O‘zbekiston har bir yo‘nalish bo‘yicha strategiya ishlab chiqqan. Har bir yo‘nalishda aniq maqsad qo‘yilgan. Masalan, biz iqtisodchimiz. Birinchi o‘rinda YIM turadi. YIMni 100 milliard dollarga yetkazish. Umid qilamizki, bunday natijaga erisha olamiz. Kambag‘allikni ikki baravarga qisqartiramiz.Kishi boshiga YIM 2800 dollardan to‘g‘ri keladi.
Bizni mamlakatimizda odamlarimiz juda mehnatkash. Katta hajmdagi mehnatni amalga oshirishlaridan xabaringiz bor. Kishi boshiga 2800 dollarlik YIM bu juda yaxshi o‘sish bo‘ladi. Keyin YIMni kishi boshiga 4000 dollarga yetkazishga harakat qilamiz. Bu juda yaxshi natija bo‘ladi. Biz mana shunday strategik yo‘nalishlar bo‘yicha harakat qilamiz. Bunga o‘z-o‘zidan kelingani yo‘q. Barcha tahlilchilar, analitiklarning xulosalari, shu yerda o‘tirgan insonlarning fikrlarini jamlab, mana shunday yo‘nalishni tanlaganmiz. Va ushbu yo‘nalish bo‘yicha harakat qilishni davom ettiramiz”, — dedi Jamshid Qo‘chqorov.
Albatta, O‘zbekistonning kelgusi besh yildagi rejalari va maqsadlari juda ko‘p va juda katta. Bosh vazir o‘rinbosari Jamshid Qo‘chqorov ularni hammasini xorijlik jurnalistga sanab berolmadi. Balki vazirimizning ingliz tilini bilish darajasi bunga xalaqit bergandir, balki, bunday savolga hali tayyor bo‘lmagandir.
Izoh (0)