DXX O‘zbekistonning bir qator hududlarida narkotik moddalar savdosiga qarshi tezkor tadbirlar o‘tkazdi.
DXXning Toshkent shahar bo‘yicha boshqarmasi xodimlari tomonidan Yunusobod tumanida o‘tkazilgan tezkor tadbirda 1976-yilda Buxoro viloyatida va 1958-yilda Jizzax viloyatida tug‘ilgan ikki fuqaro 874 gramm opiy moddasini 18 ming dollarga sotmoqchi bo‘lganlarida ushlangan.
Shuningdek, tezkor tadbir davom ettirilib, Tojikistondan keltirilgan ushbu narkotik moddaning haqiqiy egasi hisoblangan Samarqand viloyatining Urgut tumanida yashovchi, 1956-yilda tug‘ilgan shaxs ham qo‘lga olingan.
1976-yilda Sirdaryo viloyatida tug‘ilgan, muqaddam giyohvandlik vositalari savdosi bilan shug‘ullanganligi uchun jinoiy javobgarlikka tortilgan fuqaro 1985-yilda Toshkent shahrida tug‘ilgan tanishi bilan Toshkent viloyatining Oqqo‘rg‘on tumaniga borib, uchinchi shaxslar tomonidan qo‘shni Tojikistondan o‘tkazilib, xufiyona joyga yashirib ketilgan ikki dona o‘ramdagi narkotik moddani qabul qilib olgan va uni o‘zaro teng bo‘lib, biri Bo‘ka tumani tomon, ikkinchisi esa Toshkent shahri tomon yo‘l olgan.
DXXning Sirdaryo viloyati bo‘yicha boshqarmasi va viloyat bojxona boshqarmasi xodimlari tomonidan o‘tkazilgan tezkor tadbirda dastlab ulardan biri Ohangaron tumanida 988 gramm gashish bilan, ikkinchisi bo‘lsa Toshkent shahrining Yashnobod tumanida 887 gramm gashish bilan qo‘lga olingan.
Boshqa bir holatda Quvasoy shahrida yashovchi, 1987-yilda tug‘ilgan, muqaddam sudlangan fuqaro Qirg‘izistondan kontrabanda yo‘li bilan o‘tkazilgan 1 kilogramm 61 gramm gashishni kelgusida sotish maqsadida Farg‘ona shahriga olib kelgan vaqtida DXX xodimlari tomonidan qo‘lga olingan.
Farg‘ona shahrida yashovchi, 1992-yilda tug‘ilgan ikki fuqaro ham Qirg‘izistondan keltirilgan 974 gramm gashishni Quva tumanida qabul qilib, viloyat markazi tomon harakatlangan vaqtlarida ushlangan.
Namangan viloyatining Mingbuloq tumanida o‘tkazilgan tezkor tadbirda Andijon viloyatining Qo‘rg‘ontepa tumanida yashovchi, 1983-yilda tug‘ilgan, muqaddam giyohvandlik vositalari noqonuniy aylanmasi bilan bog‘liq jinoyati uchun sudlangan fuqaro va uning 1987- yilda tug‘ilgan sherigi 430 gramm gashishni sotmoqchi bo‘lganida qo‘lga olingan.
O‘z navbatida ular Qirg‘izistondan kontrabanda yo‘li bilan olib kelingan mazkur giyohvandlik vositasini Qo‘rg‘ontepa tumanida yashovchi, 2000-yilda tug‘ilgan, muqaddam sudlangan shaxsdan olgani aniqlanib, u ham ushlangan.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Izoh (0)