“Qisman mobilizatsiya e’lon qilinsa, vatanni tashlab ketayotgan yuz minglab erkaklar holati masalani jiddiy ekanini yana bir marta ko‘rsatyapti” — Iqbol Mirzo maktablarda CHYOT fanini o‘qitish haqida

Bugun, 1-noyabr kuni bo‘lib o‘tgan Oliy Majlis Qonunchilik palatasining navbatdagi yig‘ilishida Xalq ta’limi vaziri tomonidan parlament so‘roviga yuborgan javobi ko‘rib chiqildi. Unda yoshlarni harbiy vatanparvarlik ruhida tarbiyalash, shu jumladan, o‘rta ta’lim maktablarida chaqiruvga qadar boshlang‘ich tayyorgarlik fanini o‘qitish borasida amalga oshirilayotgan ishlar to‘g‘risida ma’lumot taqdim etilgan.

Yig‘ilishda mazkur masala yuzasidan Qonunchilik palatasining Fan, ta’lim, madaniyat va sport masalalari qo‘mitasi raisi o‘rinbosari Iqbol Mirzo fikr bildirdi:

Men o‘ta jiddiy masalaga diqqatlaringizni tortishni istardim. Biz Mudofaa vazirligi huzuridagi jamoatchilik kengashida faoliyat olib borgan paytimizda aynan shu masalani ko‘p o‘rganganmiz, ko‘p tanqid qilganmiz va mulohazalar bo‘lgan. Chunki vatanning mudofaasi maktabdagi tarbiya bilan bog‘liq bo‘ladi.

Maktablarimizda 5-6 yil oldin sharoitlar juda yomon edi, lekin hali ham keskin yaxshilangani yo‘q. Prezidentimiz — Oliy bosh qo‘mondon juda katta islohotlarni qilib berdilar. Ayniqsa, mutaxassis o‘qituvchilar yetishmasdi. O‘qituvchlarda oylik masalasida ham muammolar bor edi.

Harbiy xizmatdan bo‘shagan ofitserlarni dars berishga jalb qilish to‘g‘ri yechim bo‘ldi. Chunki harbiy sohada tajribasi bor odamlarning bevosita o‘quvchilar bilan muloqotlari, darslari yoshlarga boshqacharoq ta’sir ko‘rsatadi.

Hali ham bor-yo‘g‘i 3 foiz maktablarimizda o‘quv mashq miltiqlari bor. Mana shu sharoitda qo‘lida qurol ushlab ko‘rmagan bolada qanday qilib tuyg‘u paydo bo‘ladi?

Biz o‘qigan paytlarda hamma maktabda kamida 10 tadan AK avtomatlari bo‘lar edi. Uni bevostita qo‘limizda ushlab ko‘rib, zavqini tuyganmiz.

To‘g‘ri, keyingi paytlarda turli mulohazalar bilan bu qurollar yig‘ishtirib olindi. Lekin mana shu masalada qiladigan ishlarimiz ko‘p. Hatto ba’zi bir maktablarimizda haligacha saf maydonlari ham yo‘q.

Qisqa qilib aytadigan bo‘lsam, ushbu masalaga jiddiy qarab, nazoratini olib borish kerak. Amir Temurning mashhur gaplari bor: “Agar tinchlikni istasang, urushga tayyor tur”. Bugun sobiq sho‘ro hududida bo‘layotgan voqealar qisman mobilizatsiya e’lon qilinsa, vatanni tashlab ketayotgan yuz minglab erkaklar holati masalani jiddiy ekanini yana bir marta ko‘rsatyapti.

Oliy Majlis Qonunchilik palatasining spikeri Nuriddinjon Ismoilovning aytishicha, ushbu masala parlament tarixida birinchi marotaba ko‘tarilmoqda.