Ijtimoiy tarmoqlarda Samarqand viloyati Oqdaryo tumanida ma’muriy qamoq jazosini o‘tayotgan fuqaro vafot etgani haqida xabarlar tarqaldi. Viloyat Ichki ishlar boshqarmasi holatga aniqlik kiritdi.
Qayd etilishicha, Oqdaryo tumani “Oytamg‘ali” MFYda yashagan fuqaro B.R. Payariq tumani sudining buyrug‘iga asosan 2 nafar voyaga yetmagan farzandlari voyaga yetguniga qadar aliment to‘lashi belgilangan bo‘lsa-da, 2021-yil fevral oyidan 2022-yil oktabr oyiga qadar 23 million 4 ming 990 so‘m miqdorida aliment va moddiy ta’minot pullarini to‘lamasdan kelgani aniqlangan.
JIB Oqdaryo tuman sudining 2022-yil 25-oktabrdagi qarori bilan B.R.ga Ma’muriy javobgarlik to‘g‘risidagi kodeksning 47-4-moddasi (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash) 1-qismi bilan 15 sutka ma’muriy qamoq jazosi tayinlangan.
Fuqaro B.R. ma’muriy tartibda qamoqqa olingan shaxslarni saqlash uchun mo‘ljallangan Maxsus qabulxonaga 25-oktabr kuni olib borilgan.
Maxsus qabulxona ichida fuqaro B.R.ning ruhiy holati yomonlashishi (tutqanog‘i tutib qolgan) oqibatida yiqilib, bosh qismi xona ichidagi devor burchagiga urilib, tan jarohati olgan.
U bilan bir xonada saqlanayotganlar, shuningdek, maxsus qabulxona xodimlari unga zudlik bilan birinchi tez tibbiy yordam ko‘rsatib, fuqaro shifoxonaga olib borilib, unga tibbiy yordam ko‘rsatilgan.
Maxsus qabulxonaga keltirilgandan so‘ng ham fuqaro xona ichida o‘ziga-o‘zi gapirib, ruhiyatida buzilish bo‘lgani sababli Maxsus qabulxona boshlig‘i xatiga asosan viloyat ruhiy kasalliklar shifoxonasiga uning ruhiy holatini tekshirish uchun yuborilgan.
28-oktabr kuni Urgut tumani “Halqobod” mahallasida joylashgan viloyat ruhiy kasalliklar shifoxonasida fuqaro vafot etgan.
Ayni damda holat yuzasidan prokuratura organlari tomonidan tergovga qadar tekshiruv harakatlari olib borilmoqda.
Hozirda marhumning o‘limi sababiga aniqlik kiritish maqsadida sud-tibbiy ekspertizasi, IIB xodimlari va shifokorlarning harakatlari yuzasidan xizmat tekshiruvlari tayinlangan.
Izoh (0)