Germaniya tashqi ishlar vaziri Annalena Berbok O‘zbekistonga kelgandi. 1-noyabr kuni Vladimir Norov u bilan O‘zbekiston—Germaniya kun tartibining hamda ko‘p tomonlama tuzilmalar doirasidagi hamkorlikning dolzarb masalalarini ko‘rib chiqdi.
TIV matbuot xizmatining ma’lum qilishicha, suhbat chog‘ida savdo-iqtisodiy hamkorlikni kengaytirish, jumladan, Germaniya bozoriga keng turdagi sifatli va raqobatbardosh O‘zbekiston mahsulotlarini yetkazib berishni tashkil etish, Germaniyaning yetakchi kompaniyalarini jalb etgan holda qo‘shma loyihalarni amalga oshirish zarurligi ta’kidlandi.
Madaniy-gumanitar aloqalarni, ayniqsa, ta’lim va ilm-fan sohasidagi hamkorlikni chuqurlashtirish bo‘yicha takliflar ko‘rib chiqildi.
Vazirlar inson huquqlarini ta’minlash sohasida hamkorlikni mustahkamlash muhimligi haqida yakdil bo‘ldi. Shu nuqtayi nazardan Inson huquqlari bo‘yicha O‘zbekiston Milliy markazi va Germaniya Inson huquqlari instituti o‘rtasida muloqot o‘rnatish zarurligi qayd etildi. Vladimir Norov germaniyalik ekspertlarni 5—6-dekabr kunlari Toshkentda o‘tkazilishi rejalashtirilgan Inson huquqlari sohasida ta’lim bo‘yicha global forumga taklif qildi.
Ikki mamlakat tashqi ishlar vazirliklari rahbarlari atrof-muhitni muhofaza qilish sohasida, xususan, “Yashil makon” umummilliy dasturi va Germaniya tashqi ishlar vazirligining “Yashil Markaziy Osiyo” tashabbusi doirasidagi hamkorlikning alohida jihatlarini muhokama qildi.
Annalena Berbok O‘zbekistonning Orol dengizi inqirozi oqibatlariga qarshi kurashishdagi sa’y-harakatlarini yuqori baholadi va Orolbo‘yi mintaqasida ekologik va ijtimoiy loyihalarni amalga oshirish imkoniyatlarini o‘rganishga tayyorligini bildirdi.
Shuningdek, ayrim xalqaro va mintaqaviy muammolar, jumladan, Afg‘onistondagi mavjud vaziyat yuzasidan fikr almashildi.
Izoh (0)