Бугун, 1 ноябрь куни бўлиб ўтган Олий Мажлис Қонунчилик палатасининг навбатдаги йиғилишида Халқ таълими вазири томонидан парламент сўровига юборган жавоби кўриб чиқилди. Унда ёшларни ҳарбий ватанпарварлик руҳида тарбиялаш, шу жумладан, ўрта таълим мактабларида чақирувга қадар бошланғич тайёргарлик фанини ўқитиш борасида амалга оширилаётган ишлар тўғрисида маълумот тақдим этилган.
Йиғилишда мазкур масала юзасидан Қонунчилик палатасининг Фан, таълим, маданият ва спорт масалалари қўмитаси раиси ўринбосари Иқбол Мирзо фикр билдирди:
Мен ўта жиддий масалага диққатларингизни тортишни истардим. Биз Мудофаа вазирлиги ҳузуридаги жамоатчилик кенгашида фаолият олиб борган пайтимизда айнан шу масалани кўп ўрганганмиз, кўп танқид қилганмиз ва мулоҳазалар бўлган. Чунки ватаннинг мудофааси мактабдаги тарбия билан боғлиқ бўлади.Мудофаа ва хавфсизлик масалалари қўмитаси раиси Эркин Солиховнинг қўшимча қилишича, Иқбол Мирзо айтган муаммолар ҳудудлардаги мактаблар ўрганилганда ҳақиқатан борлиги аниқланган.Мактабларимизда 5-6 йил олдин шароитлар жуда ёмон эди, лекин ҳали ҳам кескин яхшилангани йўқ. Президентимиз — Олий бош қўмондон жуда катта ислоҳотларни қилиб бердилар. Айниқса, мутахассис ўқитувчилар етишмасди. Ўқитувчларда ойлик масаласида ҳам муаммолар бор эди.
Ҳарбий хизматдан бўшаган офицерларни дарс беришга жалб қилиш тўғри ечим бўлди. Чунки ҳарбий соҳада тажрибаси бор одамларнинг бевосита ўқувчилар билан мулоқотлари, дарслари ёшларга бошқачароқ таъсир кўрсатади.
Ҳали ҳам бор-йўғи 3 фоиз мактабларимизда ўқув машқ милтиқлари бор. Мана шу шароитда қўлида қурол ушлаб кўрмаган болада қандай қилиб туйғу пайдо бўлади?
Биз ўқиган пайтларда ҳамма мактабда камида 10 тадан АК автоматлари бўлар эди. Уни бевостита қўлимизда ушлаб кўриб, завқини туйганмиз.
Тўғри, кейинги пайтларда турли мулоҳазалар билан бу қуроллар йиғиштириб олинди. Лекин мана шу масалада қиладиган ишларимиз кўп. Ҳатто баъзи бир мактабларимизда ҳалигача саф майдонлари ҳам йўқ.
Қисқа қилиб айтадиган бўлсам, ушбу масалага жиддий қараб, назоратини олиб бориш керак. Амир Темурнинг машҳур гаплари бор: «Агар тинчликни истасанг, урушга тайёр тур». Бугун собиқ шўро ҳудудида бўлаётган воқеалар қисман мобилизация эълон қилинса, ватанни ташлаб кетаётган юз минглаб эркаклар ҳолати масалани жиддий эканини яна бир марта кўрсатяпти.
Олий Мажлис Қонунчилик палатасининг спикери Нуриддинжон Исмоиловнинг айтишича, ушбу масала парламент тарихида биринчи маротаба кўтарилмоқда.
Изоҳ (0)