Shaxmat bo‘yicha sobiq jahon chempioni Anatoliy Karpov Moskvadagi kasalxonaga yotqizildi. Bu haqda Telegram’dagi “112” kanali xabar bermoqda.
Manbaga ko‘ra, grossmeyster shanba kuni Davlat dumasi yonidan hushsiz holda topilgan. Hozir u reanimatsiyada. Shifokorlar Karpovga yopiq kranioserebral jarohat, chap son suyagining sinishi va spirtli ichimlikdan zaharlanish tashxisini qo‘ygan.
Tadbirkor Andrey Kovalyovga ko‘ra, Davlat dumasi deputatiga noma’lum shaxslar hujum qilgan. Ammo bu ma’lumotni Karpovga yaqin kishilar, jumladan, grossmeysterning yordamchisi tasdiqlamagan.
Ma’lumot uchun, Karpov Anatoliy Yevgenyevich shaxmatchi, xalqaro grossmeyster, xizmat ko‘rsatgan sport ustasi, jahonning 12-chempioni, jahon shaxmat olimpiadasi chempioni. Shaxmat „Oskari“ sovrindori. Xalqaro tinchlik fondlari assotsiatsiyasi prezidenti. 1951-yil 23-mayda Rossiyada tug‘ilgan.
1975-yil aprel oyida Robert Fisher o‘z unvonini himoya qilishdan bosh tortgach, Karpov yangi chempion sifatida tan olingan. U 10 yil davomida yetakchilik qilib, 1985-yilda Garri Kasparovga yutqazgan.
Izoh (0)