Шахмат бўйича собиқ жаҳон чемпиони Анатолий Карпов Москвадаги касалхонага ётқизилди

Шахмат бўйича собиқ жаҳон чемпиони Анатолий Карпов Москвадаги касалхонага ётқизилди. Бу ҳақда Telegram’даги «112» канали хабар бермоқда.

Манбага кўра, гроссмейстер шанба куни Давлат думаси ёнидан ҳушсиз ҳолда топилган. Ҳозир у реанимацияда. Шифокорлар Карповга ёпиқ краниосеребрал жароҳат, чап сон суягининг синиши ва спиртли ичимликдан заҳарланиш ташхисини қўйган.

Тадбиркор Андрей Ковалёвга кўра, Давлат думаси депутатига номаълум шахслар ҳужум қилган. Аммо бу маълумотни Карповга яқин кишилар, жумладан, гроссмейстернинг ёрдамчиси тасдиқламаган.

Маълумот учун, Карпов Анатолий Евгеньевич шахматчи, халқаро гроссмейстер, хизмат кўрсатган спорт устаси, жаҳоннинг 12-чемпиони, жаҳон шахмат олимпиадаси чемпиони. Шахмат „Оскари« совриндори. Халқаро тинчлик фондлари ассоциацияси президенти. 1951 йил 23 майда Россияда туғилган.

1975 йил апрель ойида Роберт Фишер ўз унвонини ҳимоя қилишдан бош тортгач, Карпов янги чемпион сифатида тан олинган. У 10 йил давомида етакчилик қилиб, 1985 йилда Гарри Каспаровга ютқазган.