Finlyandiyaning NATOga qo‘shilish haqidagi arizasi ratifikatsiya qilinsa, mamlakat alyansga Rossiya bilan chegaraga yadro quroli joylashtirishga ruxsat berishi mumkin. Bu haqda Finlyandiya matbuotiga tayanib, Newsweek xabar berdi.
Mudofaa sektoridagi manbalar matbuotga ma’lum qilishicha, Finlyandiya tashqi ishlar va mudofaa vazirlari Pekka Xaavisto va Antti Kaykkonen iyul oyidayoq NATO oldidagi majburiyatlarini o‘z zimmasiga olgan, ya’ni, agar Xelsinkining arizasi qabul qilinsa, ular cheklovlar yoki milliy shartlarni ilgari surishga intilmasligini aytgan.
Nashr qayd etishicha, bunday shakldagi bayonot shuni bildiradiki, NATOning yadro quroli Finlyandiya hududi orqali o‘tishi va hatto u yerga joylashtirilishi ham mumkin.
Ayni paytda Finlyandiyaning Rossiya bilan chegaralariga yadro quroli joylashtirilishi ehtimoli hukumat tomonidan rasman tasdiqlanganicha yo‘q.
Finlyandiya va Shvetsiya NATOga qo‘shilish uchun qachon ariza bergan?
18-may kuni Finlyandiya va Shvetsiya Ukrainadagi jangovar harakatlar avj olgan bir paytda NATOga qo‘shilish uchun ariza bergan. Turkiya Xelsinki va Stokgolmni mamlakatda taqiqlangan Kurdiston Ishchilar partiyasi bilan hamkorlikda ayblab, ularning alyansga qo‘shilishga bir muddat to‘sqinlik qildi.Shvetsiya va Finlyandiya NATO blokiga qo‘shilishi uchun alyansga a’zo bo‘lgan 30 ta mamlakatning barchasi tegishli bitimni ratifikatsiya qilishi kerak.
Shvetsiya va Finlyandiyaning NATOga a’zo bo‘lishini ratifikatsiya qilish jarayoni 5-iyul kuni boshlangan. Ularning NATOga qo‘shilishini alyansning 30 ta a’zosidan 28 tasi ratifikatsiya qildi.
Rossiyaning munosabati
Rossiya prezidenti Vladimir Putin Shvetsiya va Finlyandiyaning NATOga kirishi Moskva xavotiriga sabab bo‘lmasligini aytgan. Ammo u bundan Rossiyaga tahdidlar paydo bo‘lgan taqdirda mamlakat zudlik bilan javob qaytarishni aytgan.Avvalroq Finlyandiyaning Rossiya bilan chegarasi yaqinidagi Janubiy Kareliya provinsiyasining Lappeenranta shahri o‘z aeroportiga NATO bazasini joylashtirishni taklif qilishga tayyorligi ma’lum qilingandi. Bunga javoban Rossiya Davlat dumasi raisi Vyacheslav Volodin Finlyandiyaning Rossiya bilan chegara yaqinidagi shaharlariga NATO bazalarining joylashtirilishi u yerdagi aholini zarba ostiga qo‘yishini aytgan.
Izoh (0)